აშშ-ის საელჩო ირანში მოქალაქეებს მოუწოდებს დაუყოვნებლივ დატოვონ ირანი და შეიმუშავონ ქვეყნიდან გასვლის ისეთი გეგმა, რომელიც აშშ-ის მთავრობის დახმარებაზე არ იქნება დამოკიდებული. მსგავს მოწოდებას ავრცელებს აშშ-ის სახელმწიფო დეპარტამენტის საკონსულო X-ზე.

მათი განმარტებით, თუ ეს უსაფრთხოდ არის შესაძლებელი, აშშ-ის მოქალაქეებმა უნდა განიხილონ ირანის დატოვება სახმელეთო გზით — სომხეთის ან თურქეთის მიმართულებით. მათივე თქმით, აშშ–ირანის ორმაგი მოქალაქეობის მქონე პირებმა ირანი ირანული პასპორტით უნდა დატოვონ, ვინაიდან ირანი ორმაგ მოქალაქეობას არ აღიარებს და შეერთებულ შტატებთან კავშირის დემონსტრირება შესაძლოა საკმარისი საფუძველი გახდეს პირის დასაკავებლად.

"ირანის მასშტაბით საპროტესტო გამოსვლები მძაფრდება. გაძლიერებულია უსაფრთხოების ზომები, გზები იკეტება, საზოგადოებრივი ტრანსპორტის მუშაობა შეფერხდება და ინტერნეტი იბლოკება. ავიაკომპანიები კვლავ ზღუდავენ ან აუქმებენ ირანიდან და ირანის მიმართულებით ფრენებს; რამდენიმე მათგანმა მომსახურება პარასკევამდე, 16 იანვრამდე, შეაჩერა.

აშშ-ის მოქალაქეები ინტერნეტის გათიშვის გაგრძელებას უნდა ელოდონ, წინასწარ დაგეგმონ კომუნიკაციის ალტერნატიული საშუალებები და, თუ ეს უსაფრთხოდ არის შესაძლებელი, განიხილონ ირანის დატოვება სახმელეთო გზით — სომხეთის ან თურქეთის მიმართულებით.

აშშ–ირანის ორმაგი მოქალაქეობის მქონე პირებმა ირანი უნდა დატოვონ ირანული პასპორტით. ირანის ხელისუფლება არ აღიარებს ორმაგ მოქალაქეობას და აშშ–ირანის ორმაგ მოქალაქეებს მხოლოდ ირანის მოქალაქეებად განიხილავს. აშშ-ის მოქალაქეები ირანში მაღალი რისკის ქვეშ არიან დაკითხვის, დაკავებისა და დაპატიმრების თვალსაზრისით. აშშ-ის პასპორტის ჩვენება ან შეერთებულ შტატებთან კავშირის დემონსტრირება შესაძლოა საკმარისი საფუძველი გახდეს ირანის ხელისუფლებისთვის პირის დასაკავებლად", — წერია გავრცელებულ განცხადებაში.

ცნობისთვივს, ირანში მასობრივი ქუჩის საპროტესტო აქციები 28 დეკემბრიდან მიმდინარეობს. ისინი თეირანის მთავარ ბაზარში დაიწყო, სადაც ჰიპერინფლაციისა და ფასების მკვეთრი რყევებზე პროტესტის ნიშნად ბევრმა მაღაზიის მეპატრონემ თავისი სავაჭრო ობიექტი დახურა.

29 დეკემბერს ირანის ეროვნული ვალუტა, რიალი, ახალ რეკორდულ მინიმუმამდე დაეცა (ერთი რიალი დაახლოებით 0.00002 ევროს ტოლი იყო). მსოფლიო ბანკის მონაცემებით, ოქტომბერში ირანში სურსათის ინფლაციამ 64.2%-ს მიაღწია — ეს მაჩვენებელი ქვეყნის ანტიინფლაციური რეიტინგით მხოლოდ სამხრეთ სუდანს უსწრებს.

აშშ-ში დაფუძნებული ადამიანის უფლებათა დამცველი ორგანიზაცია HRANA-ს მონაცემებით, ირანში მიმდინარე არეულობის დროს 500-ზე მეტი ადამიანი დაიღუპა და 10 600-ზე მეტი დააკავეს.