აუდიტის სამსახურის პოლიტიკური პარტიების ფინანსური საქმიანობის მონიტორინგის სამსახურის უფროსი, ზურაბ აზნაურაშვილი ამბობს, რომ წინასწარი შეფასებითა და მატჩზე დაკვირვებით, სავარაუდოდ, დარღვევა არ იკვეთება. ამის შესახებ აზნაურაშვილმა On.ge-ს ქართული ოცნების თბილისის მერობის კანდიდატის, კახა კალაძის საქველმოქმედო მატჩში მონაწილეობასთან დაკავშირებით განუცხადა.

"ინფორმაციას ველოდებით საქართველოს ფეხბურთის ფედერაციიდან. გავაგზავნეთ წერილი, აქვს თუ არა რამე ხარჯი ფედერაციას გაწეული", - აღნიშნა აუდიტის სამსახურის პოლიტიკური პარტიების ფინანსური საქმიანობის მონიტორინგის სამსახურის უფროსმა.

არასამთავრობო ორგანიზაციებს მიაჩნიათ, რომ კახა კალაძის თამაშში მონაწილეობა რამდენიმე მიზეზის გამო, შესაძლო კანონდარღვევის ელემენტებს შეიცავდა. თავად კალაძე კი აღნიშნული მატჩის პირადი საარჩევნო მიზნებისთვის ორგანიზებას უარყოფს.

სამართლიანი არჩევნებისა და დემოკრატიის საერთაშორისო საზოგადოების (ISEFD) იურისტი ნინო ნიჟარაძე On.ge-ს იმ სავარაუდო დარღვევებზე ესაუბრა, რომელიც თბილისის მერობის კანდიდატს ამ თამაშით შესაძლოა წარმოეშვას, მათ შორის:

  • საქართველოს ფეხბურთის ფედერაციის მიერ საქველმოქმედო ღონისძიების ორგანიზება შეიძლება კახა კალაძის სასარგებლო შემოწირულობა იყოს, იმის მიუხედავად, რომ მათ არ დახარჯონ ფინანსები;
  • კანონი უცხო ქვეყნის მოქალაქეებს კანდიდატის საარჩევნო კამპანიაში მონაწილეობას უკრძალავს;
  • საქველმოქმედო ორგანიზაციას საარჩევნო კამპანიაში მონაწილეობა ეკრძალება. კალაძის მონაწილეობით მატჩი იძენს პოლიტიკურ ელფერს და შესაძლოა, აღიქმებოდეს, როგორც წინასაარჩევნო სააგიტაციო ღონისძიება, რომელიც თან საქველმოქმედო აქციაა.

29 სექტემბერს, 21 საათზე, დინამო არენაზე საქველმოქმედო მატჩი გაიმართა, რომელშიც ფეხბურთის მსოფლიო ვარსკვლავები და თბილისის მერობის კანდიდატმა, ყოფილმა ფეხბურთელმა, კახა კალაძემ ითამაშეს. მატჩის ორგანიზატორი საქართველოს ფეხბურთის ფედერაციაა. ფედერაციის გადაწყვეტილებით, მატჩიდან შემოსული თანხა ბორჯომის რაიონში, წაღვერის ტყეში გაჩენილი ხანძრით დამწვარი საფარის აღდგენას მოხმარდება.