Sputnik-abkhazia-ს ინფორმაციით, აფხაზეთის დე-ფაქტო ხელისუფლების კეთილი ნების ელჩებმა იუნესკოსა და გაეროს კეთილი ნების ელჩებს ვიდეომიმართვა გაუგზავნეს, სადაც ითხოვენ, რომ ორგანიზაციებმა აფხაზეთის ტერიტორიაზე არსებული ქრისტიანული ტაძრების შენარჩუნებაში დახმარებას ითხოვენ.

"1992-1993 წლების საქართველო-აფხაზეთის სამოქალაქო ომის დროს საქართველოს ჯარებმა აფხაზური კულტურის ძეგლები გაანადგურეს, აფხაზი ხალხის უნიკალური რელიკვიები და არტეფაქტები გაიტანეს, დაუნდობლად ბომბავდნენ ქრისტიანულ ეკლესიებსა და სიწმინდეებს", - ნათქვამია ვიდეომიმართვაში.

როგორც გამოცემა წერს, იქიდან გამომდინარე, რომ ე.წ. აფხაზეთის რესპუბლიკას არ აქვს საერთაშორისო აღიარება, ვერ ხერხდება შესაბამისი საერთაშორისო ორგანიზაციების ყურადღების მიქცევა, მათ შორის, იუნესკოსი, რათა ტაძრების აღდგენისთვის დროული სამუშაოები ჩატარდეს.

"შეუძლებელია 21-ე საუკუნეში ახალი ბერლინის კედლის აშენება და საერთაშორისო საზოგადოებამ გარე სამყაროსთან აფხაზეთის მოსახლეობის იზოლაციას ხელი არ უნდა შეუწყოს. სწორედ არსებული სიტუაციის გამოსწორების მიზნით, საქველმოქმედო მოძრაობის წევრები იუნესკოსა და გაეროს კეთილი ნების ელჩებს მიმართავენ".

კულტურისა და ძეგლთა დაცვის მინისტრმა მიხეილ გიორგაძემ განაცხადა, რომ იუნესკოში მიმართვა შეუძლია წევრ სახელმწიფოს:

"წევრი სახელმწიფო არის საქართველო, აფხაზეთიც და ცხინვალიც არის საქართველოს ტერიტორია. ქართული სახელმწიფოს გვერდის ავლით ვერ წარმომიდგენია ეს პროცესი როგორ უნდა დაიძრას."

მისი თქმით, საგარეო საქმეთა სამინისტროსთან ერთად შეიმუშავეს ახალი ფორმატი, რომელიც მოიცავს ოკუპირებულ ტერიტორიებზე არსებული კულტურული ძეგლების დეტალურ ანგარიშს:

"ყოველ კვარტალურად ვაგზავნით ამ ანგარიშს ყველა საერთაშორისო ორგანიზაციაში, რომლებსაც პირდაპირ ან ირიბად შეიძლება ეხებოდეს ეს საკითხი. ესაა იუნესკო, ევროკავშირი, მსოფლიო მემკვიდრეობის ცენტრი."

მინისტრის თქმით, ყოველთვის დგას მონიტორინგის ჩატარების საკითხი, რათა აფხაზეთში არსებული კულტურული ძეგლების სტატუსი შეფასდეს და ჩატარდეს შესაბამისი სამუშაოები.