ოცნების ხელისუფლების შინაგან საქმეთა მინისტრი გელა გელაძე ჩინეთში ბელარუსის საგამოძიებო კომიტეტის სანქცირებულ თავმჯდომარეს, დიმიტრი გორას შეხვდა. ბელარუსული მედიის ცნობით, სამუშაო შეხვედრა მხარეებმა ლიანუნგანგში გამართეს, სადაც "გლობალური საზოგადოებრივი უსაფრთხოების თანამშრომლობის ფორუმი" მიმდინარეობს.

მედიის ინფორმაციით, მოლაპარაკებების დროს განიხილეს სისხლის სამართლის საქმეებში იურიდიული დახმარება, შემდგომი თანამშრომლობის შესაძლო სფეროები, საგამოძიებო პროცესების დიგიტალიზაცია, თანამედროვე ანალიტიკური ინსტრუმენტების დანერგვა და პერსონალის გადამზადება.

ცნობისთვის, ბელარუსის საგამოძიებო კომიტეტის თავმჯდომარე დიმიტრი გორა აშშ-სა და ევროკავშირის ქვეყნების მიერ სანქცირებულია კრიტიკულად განწყობილი მოქალაქეების, ოპოზიციისა და არასამთავრობო სექტორის დევნისთვის.