"ფიშერი იმდენად ტრაგიკული პიროვნებაა, რომ გაძევება მისთვის იქნებოდა საჩუქარი", — ამის შესახებ ოცნების პრემიერმინისტრმა, ირაკლი კობახიძემ საქართველოში გერმანიის ელჩ პეტერ ფიშერთან დაკავშირებით განაცხადა. მისი თქმით, "როდესაც ხაზარაძის მდგმური ხარ", ტრაგედიაა.

"ფიშერი არის ტრაგიკულ მდგომარეობაში, ფიშერის დაცვაც ტრაგიკული აქტია, თუმცა არ მინდა ამაზე განსაკუთრებული კომენტარები გავაკეთო. იმდენად ტრაგიკული პიროვნებაა, რომ გაძევება მისთვის იქნებოდა საჩუქარი. ტრაგიკულია — როდესაც ხაზარაძის მდგმური ხარ, მეტი ტრაგედია რა არის, არ ვიცი", — განაცხადა კობახიძემ.

გუშინ გერმანიის საგარეო საქმეთა სამინისტრომ განცხადება გაავრცელა, რომლითაც გერმანიაში საქართველოს ელჩ პეტერ ფუშერზე ოცნების ხელისუფლების პარლამენტის თავმჯდომარის, შალვა პაპუაშვილისა და ოცნების სხვა მაღალჩინოსნების თავდასხმებს გამოეხმაურა.

"გერმანიის საგარეო საქმეთა სამინისტრო კატეგორიულად უარყოფს და გმობს ბატონი პაპუაშვილის უსაფუძვლო ბრალდებებს. ვწუხვართ, რომ დეზინფორმაციისა და დამაზიანებელი ნარატივის გავრცელებით, იგი ზიანს აყენებს გერმანია-საქართველოს ურთიერთობებს. ჩვენ კატეგორიულად უარვყოფთ "ქართული ოცნების" წარმომადგენლების აგრესიულ რიტორიკას გერმანიის ელჩის მიმართ. გერმანიის ელჩი თბილისში წარმოადგენს ფედერალური მთავრობის პოზიციას. გერმანია კიდევ ერთხელ მოუწოდებს საქართველოს ხელისუფლებას, შეწყვიტოს ევროკავშირისა და გერმანიის მთავრობის პოზიციების და პოლიტიკის შესახებ ცრუ ნარატივების გავრცელება და შეცვალოს თავისი მიმდინარე პოლიტიკური კურსი", — ნათქვამია განცხადებაში.