ამერიკის შეერთებული შტატების პრეზიდენტმა, დონალდ ტრამპმა სოციალურ ქსელში დაწერა, რომ რუსეთი, ჩრდილოეთ კორეა და ჩინეთი აშშ-ის წინააღმდეგ შეთქმულებას აწყობენ. მისი თქმით, ახლა მთავარი კითხვაა — ახსოვს თუ არა ჩინეთის სახალხო რესპუბლიკის თავმჯდომარე სის ის დიდი მხარდაჭერა და "სისხლი", რაც აშშ-მ გაიღო ჩინეთს რომ თავისუფლება მოეპოვებინა მტრულად განწყობილი უცხოელი დამპყრობლისგან.

"დიდი კითხვაა, რომელსაც პასუხი უნდა გაეცეს არის ის, ახსოვს თუ არა ჩინეთის სახალხო რესპუბლიკის თავმჯდომარე სის ის დიდი მხარდაჭერა და "სისხლი", რაც აშშ-მ გაიღო რომ ჩინეთს თავისუფლება მოეპოვებინა მტრულად განწყობილი უცხოელი დამპყრობლისგან. მრავალი ამერიკელი დაიღუპა ჩინეთის გამარჯვებისა და დიდებისკენ მიმავალ გზაზე. ვიმედოვნებ, რომ მათ შესაბამის პატივს მიაგებენ და გაიხსენებენ მათ სიმამაცესა და თავგანწირვას!

დაე, პრეზიდენტ სი ძინპინსა და ჩინელ ხალხს დიდი და ხანგრძლივი სადღესასწაულო დღე ჰქონდეთ. ასევე, ჩემი ყველაზე თბილი მოკითხვა გადაეცით ვლადიმირ პუტინს და კიმ ჩენ ინს, ვიდრე შეერთებული შტატების წინააღმდეგ შეთქმულებას აწყობთ", — დაწერა დონალდ ტრამპმა.

ცნობისთვის, დღეს ჩინეთში გამარჯვების აღლუმი მიმდინარეობს. მასში მონაწილეობას 26 სახელმწიფოს და მთავრობის მეთაური იღებს. მათ შორის არიან: რუსეთის პრეზიდენტი ვლადიმერ პუტინი, აზერბაიჯანის პრეზიდენტი ილჰამ ალიევი, სომხეთის პრეზიდენტი ვაჰან ხაჩატურიანი, ბელარუსის პრეზიდენტ ალექსანდრე ლუკაშენკო, სერბეთის პრეზიდენტი ალექსანდრ ვუჩიჩი, სლოვაკეთის პრემიერმინისტრი რობერტ ფიცო და უნგრეთის საგარეო საქმეთა მინისტრი პიტერ სიიარტო.