ჩინეთმა და სომხეთმა სტრატეგიული პარტნიორობაზე შეთანხმდნენ. ამის შესახებ ჩინეთის პრეზიდენტმა სი ძინპინმა და სომხეთის პრემიერმინისტრმა ნიკოლ ფაშინიანმა ჩინეთის ქალაქ ტიანძინში გამართულ შეხვედრაზე განაცხადეს, ინფორმაციას რუსული სამთავრობო მედია TASS ავრცელებს.

"სტრატეგიული პარტნიორობის დამყარება მნიშვნელოვანი ეტაპია ორ ქვეყანას შორის ურთიერთობების განვითარებაში', — განაცხადა სი ძინპინმა და დასძინა, რომ პეკინმა და ერევანმა უნდა გააგრძელონ ტრადიციული მეგობრობა, მტკიცედ დაუჭირონ მხარი ერთმანეთს, გააღრმაონ თანამშრომლობა სხვადასხვა სფეროში და ისწრაფონ ახალი მიღწევებისკენ ორმხრივ ურთიერთობებში.

ჩინეთის ლიდერმა ასევე მოუწოდა "ერთი სარტყელი, ერთი გზა" ინიციატივის ერთობლივი განვითარებისკენ, ქვეყნებს შორის ურთიერთდაკავშირებულობის გაძლიერებისკენ და ხაზგასმით აღნიშნა, რომ ჩინეთი მხარს უჭერს სომხეთის შანხაის თანამშრომლობის ორგანიზაციაში (SCO) გაწევრიანებას.

შანხაის თანამშრომლობის ორგანიზაციის სახელმწიფო მეთაურთა საბჭოს 25-ე სამიტი, რომელსაც ჩინეთი და რუსეთი ხელმძღვანელობენ, 31 აგვისტოს და 1 სექტემბერს ტიანძინში გაიმართება.

როგორც უკვე წერდა NEWS.On.ge, ჩინეთმა სტრატეგიული პარტნიორი საქართველო გამარჯვების აღლუმზე არ მიიწვია.