რუსეთის პრეზიდენტმა ვლადიმერ პუტინმა, ჩინეთის პრეზიდენტ სი ძინპინთან და ინდოეთის პრემიერმინისტრ ნარენდრა მოდისთან შეხვედრის შემდეგ, ორშაბათს განაცხადა, რომ უკრაინაში მდგრადი მშვიდობის მისაღწევად აუცილებელია NATO-ს აღმოსავლეთით გაფართოების საკითხის გადაჭრა. ამის შესახებ ინფორმაციას Reuters ავრცელებს.

სიტყვით გამოსვლისას პუტინმა განაცხადა, რომ დასავლეთმა სცადა უკრაინა საკუთარ ორბიტაში მოექცია და შემდეგ ყოფილი საბჭოთა რესპუბლიკა NATO-ს სამხედრო ალიანსში ჩაეთრია.

"იმისთვის, რომ უკრაინის საკითხის მოგვარება იყოს მდგრადი და გრძელვადიანი, კრიზისის ძირეული მიზეზები უნდა აღმოიფხვრას," — აღნიშნა პუტინმა.

მისივე თქმით, ასევე აუცილებელია "უსაფრთხოების სფეროში სამართლიანი ბალანსის აღდგენა", რაც NATO-სა და ევროპულ უსაფრთხოებაზე რუსეთის მოთხოვნებს გულისხმობს.

Reuters-ის ცნობით, მაისში პუტინის პირობებში ომის დასასრულებლად შედიოდა დასავლელი ლიდერებისგან წერილობითი ვალდებულება NATO-ს გაფართოების შეჩერებისა და რუსეთის წინააღმდეგ სანქციების ნაწილის მოხსნის შესახებ.

პუტინის თქმით, "შეთანხმებებს", რომლებსაც მან აშშ-ის პრეზიდენტ დონალდ ტრამპთან აგვისტოში ალასკაში გამართულ სამიტზე მიაღწია, უკრაინაში მშვიდობის გზას ხსნის, რაზეც ის ჩინეთში რეგიონული სამიტის მონაწილე ლიდერებთან იმსჯელებს.

პუტინმა აღნიშნა, რომ კვირას დეტალურად გააცნო სი ძინპინს ტრამპთან მოლაპარაკებების შედეგები და უკვე დაწყებული სამუშაოები კონფლიქტის მოგვარების მიმართულებით, და პირადად მიაწვდის მეტ ინფორმაციას ორმხრივი შეხვედრებისას.

ცნობისთვის, პუტინის თვითმფრინავი ჩინეთის ქალაქ ტიანძინში, ბინჰაის აეროპორტში კვირას, 31 აგვისტოს, დილით დაეშვა.

რუსეთის ლიდერის ვიზიტი ჩინეთში პრეზიდენტ სი ძინპინის მოწვევით ოთხი დღე გაგრძელდება – 31 აგვისტოდან 3 სექტემბრამდე. რუსეთის პრეზიდენტის თანაშემწის, იური უშაკოვის თქმით, ერთ ქვეყანაში ასეთი ხანგრძლივი ვიზიტები ძალიან იშვიათია.

პუტინი მონაწილეობას მიიღებს შანხაის თანამშრომლობის ორგანიზაციის სამიტში, რომელიც ტიანძინში 31 აგვისტოდან 1 სექტემბრამდე გაიმართება.