რუსთავი 2 აუდიო ჩანაწერს აქვეყნებს, რომელზეც ტელეკომპანიის მტკიცებით საქართველოს მართლმადიდებელი ეკლესიის პატრიარქის, ილია მეორის მდივან-რეფერანტის, შორენა თეთრუაშვილის ჩვენებაა ასახული. ჩვენების მიხედვით, ილია მეორემ სახელწმიფოსა და საპატრიარქოს შორის 2002 წელს გაფორმებულ შეთანხმებას გვერდი აურა, როდესაც დეკანოზი გიორგი მამალაძე საპატრიარქოს ქონების განმკარგველად დანიშნა.

როგორც აუდიო ჩანაწერით ირკვევა, ილია მეორს განკარგულებით, საპატრიარქოს ქონების მართვის სამსახური 2015 წელს დაფუძნდა და მის ხელმძღვანელად უშუალოდ პატრიარქის მითითებით, დეკანოზი გიორგი მამალაძე დაინიშნა.

შორენა თეთრუაშვილის თქმით, აღნიშნული სამსახურის შექმნამდე საპატრიარქოს ქონების აღრიცხვა და კლასიფიკაცია არ ხდებოდა, ხოლო მამალაძემდე ქონებრივ საკითხებთან დაკავშირებულ დოკუმენტაციას ხელს ქორეპისკოპოსი მეუფე იაკობი აწერდა. მანამდე კი იმავე ფუნქციას ასრულებდა მეუფე თეოდორეც, მამა მიქაელ ბოტკოველიც.

"არ მინდა ამაზე ლაპარაკი, მაგრამ მოხდა ისეთი რამ, რომ უსიამოვნება შეიქმნა მეუფე იაკობსა და სოსო ოხანაშვილს შორის. ამ უსიამოვნებამ განაპირობა ის, რომ მეუფე აღარ მოდიოდა ხოლმე საპატრიარქოში და კონტაქტიც მასთან ჭირდა. ნაწყენი იყო მეუფე იაკობი იმ ურთიერთობით, რომელიც ჩამოყალიბდა მათ შორის. შემდეგ ასე დაისვა საკითხი, რომ ვინ იქნებოდა ის პირი, რომელიც ხელს მოაწერდა. როგორ გადაწყდა, რომ მამა გიორგი მამალაძეს მიენიჭა ეს უფლება ამაზე მე ვერაფერს მოგახსენებთ."

შორენა თეთრუაშვილის თქმით, პრობლემა იმან გამოიწვია, რომ მამა გიორგის მიეცა იმაზე მეტი უფლებები, ვიდრე ეპისკოპოსებს და ქორეპისკოპოსსაც კი:

"პატრიარქი კი არ შეცდა, პატრიარქმა ვერ გაითვალისწინა ის შედეგი, რა შედეგიც მოჰყვა ამას. კონსტიტუციური შეთანხმების მიხედვით, ეკლესიის წარმომადგენლობითი უფლება აქვს აქვს კათალიკოს პატრიარქს, ქორეპისკოპოსს და მდივანს. რაკი მამა გიორგი მამალაძე არ იყო მდივანი და ამ ფუნქციით აღიჭურვა, ამან სამართლებრივადაც შექმნა პრობლემა და ეს მდგომარეობა სხვა ეპისკოპოსებისათვის გახდა სალაპარაკო თემა. თუმცა უწმინდესს შეეძელო ეს უფლება-მოსილება დაეტოვებინა, მაგრამ კანონთან მიმართებაში ხდებოდა აცდენა.