"მე არ ვერჩი სხვათაშორის, არც არაბებს, ხაზგასმით ვამბობ ამას და არცერთი სხვა ეროვნების წარმომადგენლებს, მაგრამ საქართველოში დომინანტი უნდა იყოს ქართველი და საქართველოს მოქალაქე", - ასე უპასუხა პატრიოტთა ალიანსის ლიდერმა და თბილისის მერობის კანდიდატმა ირმა ინაშვილმა ტვ პირველის ეთერში მიწების ინვესტორებზე გასხვისებაზე დასმულ კითხვას.

მისი თქმით, ინვესტიციების დროს, შეიძლება შერეული კომპანია იყოს, სადაც 51 პროცენტის მფლობელი საქართველოს მოქალაქე იქნება:

"თუნდაც სამხრეთ კორეული გამოცდილებიდან, ტექნოლოგიების სფეროში, კი ბატონო, გავხსნათ, ვიყიდოთ ლიცენზიები, იყიდება ეს ლიცენზიები, შემოვიტანოთ და ჩვენ განვახორციელოთ. ჩვენს მიწებს ასე უპრაგონოდ კი ნუ დავთმობთ. ჩვენ ვხედავთ კახეთში რა ხდება, შენდება არაბული სოფლები, ინდური სოფლები, არავითარი საინვესტიციო პირობები იქ არ არის დაცული. იქ ხდება ჩასახლებების ორგანიზება და არის პატარა სოფლები".

პატრიოტთა ალიანსის წარმომადგენლები უკვე რამდენიმე დღეა თბილისის პარლამენტის შენობის წინ აქციებს მართავენ. მათ შიმშილობის აქცია 17 სექტემბერს დაიწყეს. პატრიოტთა ალიანსი ითხოვს მიწების უცხოელებზე გასხვისების აკრძალვას, რუსეთთან პირდაპირი დიალოგის დაწყებასა და მაჟორიტარული საარჩევნო სისტემის გაუქმებას.

შენიშვნა: On.ge ირმა ინაშვილის ქსენოფობიურ მოსაზრებას მხოლოდ და მხოლოდ იმიტომ გთავაზობთ, რომ მოქალაქეებმა იცოდნენ, რა მოსაზრება აქვს მათ მიერ არჩეულ პარლამენტარსა და დედაქალაქის მერობის კანდიდატს.