სოციალ-დემოკრატიული პარტია (SPD) აცხადებს, რომ უნდა გადაიდგას პირველი იურიდიული ნაბიჯები ულტრა-მემარჯვენე პოპულისტური პარტია "ალტერნატივა გერმანიისთვის" (AfD) არაკონსტიტუციურად გამოცხადების მიზნით — ამის შესახებ Deutsche Welle გვატყობინებს.

დისკუსია იმის შესახებ — უნდა აიკრძალოს თუ არა AfD — რომელიც პარლამენტში ძლიერი პოლიტიკური ძალაა — მას შემდეგ გააქტიურდა, რაც გერმანიის შიდა დაზვერვის სააგენტომ AfD მაისში ოფიციალურად დაასახელა როგორც "დადასტურებულად ულტრა-მემარჯვენე ექსტრემისტული ჯგუფი". ამ შეფასებას პარტია სამართლებრივად ასაჩივრებს და საკითხი სასამართლოში განხილვის პროცესშია.

სოციალ-დემოკრატიული პარტიის რეზოლუცია, რომელიც ბერლინში სამდღიანი ყრილობის დასასრულს წარადგინეს, მიმართავს შესაბამის კონსტიტუციურ ორგანოებს, რომ დაიწყონ სამართლებრივი პროცესი და AfD არაკონსტიტუციურად გამოცხადდეს, როგორც საემიგრაციო პოლიტიკის საწინააღმდეგო პარტია.

"როდესაც შიდა დაზვერვა ამბობს, რომ ეს არის დადასტურებული ულტრა-მემარჯვენე ექსტრემისტული პარტია, ტაქტიკებისთვის ადგილი აღარ რჩება," — განაცხადა პარტიის თანათავმჯდომარემ ლარს კლინგბაილმა, რომელიც ამავდროულად ფინანსთა მინისტრის და ვიცე-კანცლერის თანამდებობას იკავებს კონსერვატორების ხელმძღვანელობით მოქმედ მთავრობაში.

რეზოლუციის ტექსტში ვკითხულობთ: "დადგა დრო, რომ უფლებამოსილმა კონსტიტუციურმა ორგანოებმა შექმნან პირობები, რათა დაუყოვნებლივ დაიწყოს პროცესი AfD-ის არაკონსტიტუციურად ცნობისთვის."

გერმანიის შინაგან საქმეთა მინისტრმა ალექსანდერ დობრინდტი, რომელიც ბავარიის ქრისტიან-სოციალური კავშირის (CSU) წევრია — რეზოლუციას სკეპტიკურად მიუდგა.

"SPD-ის პარტიულ ყრილობაზე მიღებული გადაწყვეტილებები ავტომატურად არ წარმოადგენს შინაგან საქმეთა მინისტრის მანდატს," — განაცხადა დობრინდტმა Table.Today-ის პოდკასტში.