იაპონიაში მცხოვრები 27 წლის უნივერსიტეტის სტუდენტი, რომელიც ფუჯის მთაზე ოფიციალური სამთო სეზონის მიღმა, შეუსაბამო ამინდში ავიდა, ოთხი დღის განმავლობაში ორჯერ გადაარჩინეს — მეორედ მაშინ, როცა მობილური ტელეფონის საძებნელად უკან დაბრუნდა.

სტუდენტი პირველად მაშველებმა სამშაბათს იხსნეს, მას შემდეგ, რაც ფუჯინომიას გზაზე ავიდა — ზღვის დონიდან დაახლოებით 3,000 მეტრის სიმაღლეზე.

ის გზიდან ჩამოსვლას ვეღარ ახერხებდა მას შემდეგ, რაც კრამპონები დაკარგა — ეკლებიანი მოწყობილობა, რომელიც სამთო ფეხსაცმლის ძირს უკავშირდება და უკეთეს მოჭიდებას უზრუნველყოფს ყინულზე ან თოვლზე.

რამდენიმე დღის შემდეგ ის მთაზე დატოვებული ნივთების წამოსაღებად კვლავ დაბრუნდა, სადაც მეორედ გახდა საშველი სიმაღლის დაავადებით გამოწვეული სიმპტომების გამო. ამჟამად სტუდენტის მდგომარეობა სტაბილურია და საფრთხე არ ემუქრება.

მკაცრი ამინდის პირობების გამო, ფუჯის მთაზე ოფიციალურ სეზონს მიღმა ასვლა არ არის რეკომენდებული. ოფიციალური სამთო სეზონი ივლისის დასაწყისში იწყება და სექტემბრის დასაწყისამდე გრძელდება.

გარემოს დაცვის სამინისტროს განცხადებით, ამ პერიოდში ყველა ბილიკი, რომელიც ფუჯის მწვერვალზე მიდის, დახურულია.

ფოტო: Japan Wireless

მაშველთა მეორედ ჩარევის შემდეგ, შიზუოკას პრეფექტურის პოლიციამ კვლავ მოუწოდა საზოგადოებას, არ სცადონ ფუჯის მთაზე ასვლა სეზონის გარეთ, რადგან ამინდი შესაძლოა მოულოდნელად შეიცვალოს, რაც მაშველებისთვის სამუშაოს ართულებს. ასევე, სამედიცინო პუნქტები ბილიკებზე ამ დროს დახურულია.

სოციალური ქსელ X-ის რამდენიმე მომხმარებელი სტუდენტის ქცევას აკრიტიკებდა და წერდა, რომ მას უნდა დაეფარა ორივე სამაშველო ოპერაციის ხარჯი, რადგან უსაფრთხოების რეკომენდაციები არ გაითვალისწინა.

ფუჯის მთა, რომელიც თავისი იდეალური კონუსის ფორმითაა ცნობილი მთელ მსოფლიოში, იაპონიის ერთ-ერთი ყველაზე პოპულარული ტურისტული ადგილია. ბოლო წლებში ხელისუფლებამ გადატვირთული ტურიზმის საწინააღმდეგოდ ნაბიჯები გადადგა და ბილიკებზე ასვლის გადასახადი გაზარდა.

2023 წელს ფუჯის მთაზე ივლისიდან სექტემბრამდე პერიოდში 220,000-ზე მეტი ადამიანი ავიდა.