მიუხედავად იმისა, რომ ჯერ ერთი კვირაც არ გასულა მას შემდეგ, რაც კეტი პერი და 5 სხვა ქალი ჯეფ ბეზოსის კომპანიის, Blue Origins-ის ხომალდით კოსმოსში გაემგზავრნენ, მომღერალი თავის გადაწყვეტილებას უკვე ნანობს.

6-კაციანი ეკიპაჟი კოსმოსში ფემინიზმის სახელით, "ერთმანეთის გაძლიერებისა" და კაცობრიობის დაახლოების მიზეზით გაფრინდა, რასაც გარემოსდამცველებისა და აქტივისტების მხრიდან მძიმე კრიტიკა მოჰყვა. ბრიტანულ გამოცემასთან, Daily Mail-თან საუბრისას კეტი პერისთან დაახლოებული პირი ამბობს, რომ პოპვარსკვლავს რომ შეეძლოს, თავის გადაწყვეტილებას შეცვლიდა: "კეტი კოსმოსში გაფრენას არ ნანობს, ეს ცხოვრების შემცვლელი გამოცდილება იყო. რასაც ნანობს ამ მოგზაურობის საჯარო სპექტაკლად ქცევაა."

ფემინისტების ნაწილმა "კოსმოსური ეკიპაჟი" იმის გამო გააკრიტიკა, რომ ასეთი მაღალი ხარისხის პიარ-კამპანია მხოლოდ ზედაპირულ სიმბოლურ ჟესტად აღიქმება, რომელიც რეალურ გენდერულ უთანასწორობაზე ნაკლებად ამახვილებს ყურადღებას. მათ აზრით, არაეთიკურია, როდესაც პრივილეგირებული ქალები — ცნობილი სახეები — კოსმოსში გასართობად მოგზაურობენ, მაშინ, როცა მილიონობით ქალი ჯერ კიდევ ყოველდღიურად ებრძვის სიღარიბეს, ძალადობასა და განათლების მიუწვდომლობას.

მეორე მხრივ, გარემოს დამცველებმა გაფრენა ეკოლოგიური კუთხით გააკრიტიკეს. მათი განცხადებით, კოსმოსური ტურიზმი და კერძო ფრენები უზარმაზარ ნახშირბადულ კვალს ტოვებს და კიდევ უფრო აღრმავებს კლიმატურ კრიზისს. ისინი ამტკიცებენ, რომ ასეთი პროექტები მდგრადი მომავლის იდეასთან შეუსაბამოა, განსაკუთრებით მაშინ, როცა დედამიწაზე ეკოსისტემები განადგურების პირას არიან.

Blue Origin-ის განვითარებადი "კოსმოსური ტურიზმის პროგრამა" მგზავრებს ჰპირდება "რამდენიმე წუთს უწონადობის მდგომარეობაში" და ცხოვრებისეულად შემცვლელ ხედვას დედამიწაზე. ასტრონავტების კაფსულა, რომელიც სამ პარაშუტზე იყო ჩამოკიდებული, რაკეტის აფრენიდან რამდენიმე წუთში უსაფრთხოდ დაეშვა.

იხილეთ ასევე:

კოსმოსში 8 წუთის გატარების შემდეგ კეტი პერიმ მიწას აკოცა — როგორია "კოსმოსური ტურიზმი"?