პოპვარსკვლავი კეტი პერი, ჯეზ ბეზოსის საცოლე ლორენ სანჩესი და ამერიკელი ტელეწამყვანი გეილ კინგი იმ ექვს მგზავრს შორის იყვნენ, რომლებიც ორშაბათს, ჯეფ ბეზოსის კოსმოსური "ტურისტული" კომპანიის – Blue Origin-ის მეშვეობით, სრულად ქალებით დაკომპლექტებულ გუნდთან ერთად კოსმოსში გაფრინდნენ.

Blue Origin-ის რაკეტა კოსმოსში ორშაბათს დილით, ტეხასის დროით 9:30-ზე გაფრინდა, ტეხასის დასავლეთში მდებარე გაშვების ობიექტიდან. "ვარსკვლავურ" ეკიპაჟში კეტი პერის, ლორენ სანჩესისა და გეილ კინგის გარდა შედიოდნენ კოსმოსური ინჟინერი აიშა ბოუი, სამოქალაქო აქტივისტი ამანდა ნუენი და კინოპროდიუსერი კერიენ ფლინი.

რვაწუთიანი ფრენის განმავლობაში რაკეტამ დედამიწის ატმოსფეროში 100 კილომეტრზე მეტი გაიარა და გადაკვეთა კარმანის ხაზი, რომელიც კოსმოსის საერთაშორისოდ აღიარებულ საზღვრად ითვლება.

Blue Origin-ის განვითარებადი "კოსმოსური ტურიზმის პროგრამა" მგზავრებს ჰპირდება "რამდენიმე წუთს უწონადობის მდგომარეობაში" და ცხოვრებისეულად შემცვლელ ხედვას დედამიწაზე. ასტრონავტების კაფსულა, რომელიც სამ პარაშუტზე იყო ჩამოკიდებული, რაკეტის აფრენიდან რამდენიმე წუთში უსაფრთხოდ დაეშვა.

რაკეტის გაფრენის წინა დღეს კეტი პერიმ თავის მსმენელს უთხრა, რომ კოსმოსში აუცილებლად იმღერებდა. როგორც ირკვევა, მან თავისი დაპირება შეასრულა და მართლაც იმღერა — მომღერლის რჩეული სიმღერა ლუი არმსტრონგის What a Wonderful World გახდა.

Amazon-ის დამფუძნებელი და თავმჯდომარე ჯეფ ბეზოსი პირველი იყო, ვინც ასტრონავტებს მიწაზე დაბრუნების შემდეგ მიესალმა — სწორედ მან გახსნა კაფსულის კარი და სანჩესს მიეგება. შემდეგ კაფსულიდან კეტი პერი გამოვიდა — მომღერალმა მუხლებზე დაიჩოქა და ქვიშიან მიწას აკოცა. გეილ კინგმაც იგივე გაიმეორა.

ფოტო: Blue Origin

Blue Origin კოსმოსური ტურიზმის განვითარებას გეგმავს, ამიტომ ჯეფ ბეზოსის კომპანიის მიერ დაგეგმილ კოსმოსურ ექსკურსიებს ამიერიდან ალბათ უფრო ხშირად ვიხილავთ.

იხილეთ ასევე:

ჯეფ ბეზოსი თავის საცოლესა და კეტი პერის სხვებთან ერთად უშვებს კოსმოსში