თბილისში გამართულ საქართველო-ჩინეთის სავაჭრო-ეკონომიკური თანამშრომლობის ერთობლივი კომისიის მე-9 სხდომაზე საქართველოსა და ჩინეთს შორის თავისუფალი ვაჭრობის გაღრმავების პერსპექტივებსა და საინვესტიციო ურთიერთობების, ასევე ტრანსპორტის, ლოგისტიკის, ენერგეტიკის, საინფორმაციო ტექნოლოგიების და ინოვაციების, ტურიზმის, სოფლის მეურნეობის და სხვა სფეროებში თანამშრომლობის საკითხებსა და მათი გაღრმავების პერსპექტივებზე იმსჯელეს. ინფორმაციას ოცნების ხელისუფლების ეკონომიკისა და მდგრადი განვითარების სამინისტრო ავრცელებს.

მათ ცნობით, სხდომა ოცნების ხელისუფლების ეკონომიკისა და მდგრადი განვითარების მინისტრის, ლევან დავითაშვილისა და ჩინეთის სახალხო რესპუბლიკის კომერციის მინისტრის მოადგილის, ლინ ძის თანათავმჯდომარეობით გაიმართა.

მხარეებმა იმსჯელეს ორ ქვეყანას შორის პირდაპირ ფრენებთან დაკავშირებულ საკითხებზეც. განხილვის ერთ-ერთი თემა ასევე იყო შუა დერეფნის მნიშვნელობა და საქართველოს როლი აღნიშნული დერეფნის განვითარებაში.

"საქართველოსა და ჩინეთს შორის თავისუფალი სავაჭრო შეთანხმებამ მნიშვნელოვნად გააძლიერა ორმხრივი სავაჭრო და ეკონომიკური თანამშრომლობა. საქართველო გახდა პირველი ქვეყანა რეგიონში, რომელმაც დააწესა თავისუფალი ვაჭრობის რეჟიმი ჩინეთთან და ამით ხაზი გაესვა საქართველოს სტრატეგიულ მნიშვნელობას, როგორც სავაჭრო პარტნიორისა და სატრანზიტო ჰაბის", — აღნიშნა ლევან დავითაშვილმა.

მისი ინფორმაციით, 2024 წლის მონაცემებით, ქვეყნებს შორის სავაჭრო ბრუნვა, წინა წლის მაჩვენებელთან შედარებით 17%-ით გაიზარდა და 1.92 მილიარდი აშშ დოლარი შეადგინა. სავაჭრო ბრუნვის მიხედვით, ჩინეთმა მე-4 ადგილი დაიკავა საქართველოს უმსხვილეს სავაჭრო პარტნიორებს შორის.

"ბოლო პერიოდი სავსე იყო მნიშვნელოვანი ეკონომიკური გამოწვევებით, მაგრამ გააზრებული ეკონომიკური პოლიტიკისა და მიმდინარე რეფორმების შედეგად, ქვეყანამ წარმატებით გადალახა გარე შოკები, შეინარჩუნა მაკროეკონომიკური სტაბილურობა. პოსტპანდემიურ პერიოდში საქართველო ეკონომიკური ზრდის კუთხით რეგიონსა და ევროპაში ერთ-ერთი ყველაზე წარმატებული ქვეყანაა, გასულ წელს ეკონომიკური ზრდის საშუალო მაჩვენებელმა 9.7% შეადგინა. რეკორდული მაჩვენებლები დაფიქსირდა საქონლის ექსპორტისა და საერთაშორისო ტურიზმიდან მიღებული შემოსავლების მხრივ - 2024 წელს ექსპორტი 7.8%-ით გაიზარდა და 6.6 მილიარდი აშშ დოლარი შეადგინა, ხოლო ტურიზმიდან მიღებული შემოსავალი 7.3%-ით გაიზარდა და ისტორიულ მაქსიმუმს – 4.4 მილიარდ აშშ დოლარს მიაღწია", — აღნიშნა ლევან დავითაშვილმა.