25 მარტს საბავშვო ბაღში მისულ მშობლებს ასეთი ანონიმური ყუთი დახვდათ, რაც, მათი თქმით, ძალიან ჰგავდა "საბჭოთა დროის დასმენას". მშობლებისა და საზოგადოების რეაქციის შემდეგ, ბაღის ადმინისტრაციამ ყუთზე წარწერა შეცვალა.

"ჩემი შვილების ბაღში დადგეს ყუთი, წარწერით: "ანონიმური ყუთი", რომელიც ჩემი პროტესტის და საზოგადოების ჯანსაღი პოზიციის შემდეგ შეიცვალა ასეთი ყუთით", — წერს ჟურნალისტი თამთა ჯანაძე სოციალურ ქსელში და ძველი და ახალი ყუთების ფოტოებს აქვეყნებს.

თბილისის 197-ე საბავშვო ბაღში ანონიმური ყუთს სახელი შეუცვალეს და დააწერეს: "მშობლებო! თქვენი აზრი ჩვენთვის მნიშვნელოვანია".

თბილისის 197-ე საბავშვო ბაღში ანონიმური ყუთს სახელი შეუცვალეს და დააწერეს: "მშობლებო! თქვენი აზრი ჩვენთვის მნიშვნელოვანია".

ფოტო: თამთა ჯანაძე

მანამდე თამთა ჯანაძე წერდა, რომ ასე ჩუმად "დანოსების" წერა სამარცხვინოა.

"ჩემი შვილების საბავშვო ბაღში დღეს, საუკეთესო საბჭოთა ტრადიციების გათვალისწინებით, ეს ანონიმური ყუთი დამხვდა.

მოკლედ, ზედმეტად რომ არ შევწუხდეთ მშობლები პრეტენზიების გამოთქმის გზების ძიებით, ბაღების სააგენტო მარტივ გზას გვთავაზობს: დაწერ "დანოსს", გაიხედ-გამოიხედავ, ხომ არავინ გიყურებს, მოათავსებ ამ ყუთში და ყველა პრობლემა "მოგვარდება".

ამას როგორ გვიბედავთ ან ჩვენ — მშობლებს, ან იმ პედაგოგებს, რომელთა შრომაც 400-500 ლარად გაქვთ შეფასებული? (აქვე შეგახსენებთ, რომ საქსტატის მონაცემებით საქართველოში საშუალო ხელფასი 2200 ლარია).

ანუ რას გვეუბნებით? რომ მასწავლებელს, რომელსაც ჯგუფში არანაკლებ 50-60 ბავშვი ჰყავს და სრულიად მათხოვრული ხელფასის მიუხედავად, არაადამიანური შრომის გაწევა უწევს, ჩავუსაფრდე და თუ რამე არ მომეწონება, ჩუმად დავასმინო?

თბილისის მერია, თბილისის საბავშვო ბაგა-ბაღების გაერთიანების სააგენტო, პრეტენზიები ჩვენს საგანმანათლებლო სისტემასთან მე რომ მაქვს იმდენი უნდა, გინდ სკოლამდელთან და გინდ სასკოლოსთან და როცა საჭიროდ ვთვლი, არც საკუთარი სახელით და გვარით გაპროტესტებაზე დამიხევია უკან, მაგრამ ცხოვრებაში ჩუმად და ასე ნაბიჭვრულად არაფერი გამიკეთებია და ეს რამ მოგაფიქრათ?

ეს სამარცხვინო ანონიმური ყუთები მოაშორეთ დაუყოვნებლივ!!! ვიდრე ბავშვებმა შეამჩნიეს და დასვეს ყველაზე საშიში კითხვა: რაში გვჭირდება ეს თეთრი ყუთი?", — წერს თამთა ჯანაძე.

რადიო თავისუფლებას ცნობით, ბაღში განმარტეს, რომ მათთვის ეს მხოლოდ მშობლებთან კომუნიკაციის და უკუკავშირის, მათ შორის კრიტიკის მიღების ერთ-ერთი გზაა.