რუსეთის პრეზიდენტმა ვლადიმერ პუტინმა ბადრა გუნბას აფხაზეთის თვითგამოცხადებული რესპუბლიკის პრეზიდენტად არჩევა დეპეშით მიულოცა. ამის შესახებ ეხო კავკაზა წერს.

"გთხოვთ მიიღოთ ჩემი გულწრფელი მილოცვა აფხაზეთის რესპუბლიკის პრეზიდენტად არჩევის გამო", — ნათქვამია კრემლის პრესსამსახურის მიერ გამოქვეყნებულ ინფორმაციაში.

"არჩევნებში გამარჯვებამ, რომელიც ხალხის ნების თავისუფლად გამოხატვის პირობებში მოხდა, დაადასტურა აფხაზეთის მოქალაქეების მხარდაჭერა თქვენი ხაზის შიდაპოლიტიკური სტაბილურობისა და ქვეყნის პროგრესული სოციალურ-ეკონომიკური განვითარების უზრუნველსაყოფად.

იმედი მაქვს, რომ მეგობრული რუსეთ-აფხაზური ურთიერთობები გაგრძელდება ჩვენი მოძმე ხალხების საკეთილდღეოდ", — ნათქვამია წერილში.

შეგახსენებთ, რომ ბადრა გუნბამ 1-ელ მარტს გამართულ ე.წ.საპრეზიდენტო არჩევნების მეორე ტურში გაიმარჯვა. მან ხმების 54,73% მიიღო, მეორე კანდიდატმა ადგურ არძინბამ 41,54%.

ეხო კავკაზა წერს, რომ პირველი ტურის შემდეგ, რუსეთმა სოხუმთან, ბადრა გუნბას მხარდასაჭერად გააძლიერა კონტაქტები. კერძოდ, მოსკოვმა ოკუპირებულ აფხაზურ მხარეს გადასცა სასკოლო ავტობუსები; გუნბამ სატელეფონო საუბრები გამართა რუსეთის ეკონომიკის მინისტრთან მაქსიმ რეშეტნიკოვთან და რუსეთის ფედერაციის ვიცე-პრემიერთან ტატიანა გოლიკოვასთან; რუსეთის ჯანდაცვის სამინისტროს ხელმძღვანელი მიხეილ მურაშკო აფხაზეთს ეწვია. სოხუმში ჩავიდა გამარჯვების მატარებლის მუზეუმიც და ა.შ.

მიუხედავად იმისა, რომ ადგურ არძინბა, ისევე როგორც ბადრა გუნბა, რუსეთთან სტრატეგიული ურთიერთობების განვითარების აუცილებლობას უსვამს ხაზს, ოპოზიციონერს ბრალს სდებდნენ პროთურქულ და ანტისომეხურ პოზიციაში. მას შემდეგ, რაც სოციალურ ქსელებში გავრცელდა აუდიოჩანაწერი, სადაც არძინბას მხარდამჭერი ენვერ ბგანბა "სომხებთან ურთიერთობას" მოუწოდებდა, რუსეთის საგამოძიებო კომიტეტმა სისხლის სამართლის საქმე აღძრა "აფხაზეთში მცხოვრები სხვადასხვა ეროვნების რუსი მოქალაქეების მიმართ სიძულვილისა და მტრობის გაღვივების ფაქტზე". მოსკოვმა განაცხადა, რომ ეს იყო "მოწოდებები ძალადობისკენ სომეხი ერის წარმომადგენლების მიმართ".

აფხაზეთში შიდაპოლიტიკური ვითარება სახელმწიფო უსაფრთხოების სამსახურის უფროსის მოვალეობის შემსრულებლის, დიმიტრი კუჭუბერიას გადაყენების შემდეგ გაუარესდა. ბადრა გუნბას გუნდმა განაცხადა, რომ ეს გასული წლის ნოემბერში პრეზიდენტ ასლან ბჟანიას გადადგომის შემდეგ მიღწეული შეთანხმებების დარღვევის გამო მოხდა.

დაძაბულობა გუნბასა და არძინბას შორის შეთანხმების ხელმოწერის შემდეგ ჩაცხრა, როცა ისინი შეთანხმდნენ, რომ ეღიარებინათ არჩევნების შედეგები "თუ იქნებოდა მათი ლეგიტიმურობის ობიექტური დადასტურება".