"რუსეთისა და შეერთებული შტატების ეროვნული ინტერესები არასოდეს დაემთხვევა ერთმანეთს, მაგრამ იქ, სადაც ისინი ერთმანეთს ემთხვევა, ყველაფერი უნდა გაკეთდეს იმისათვის, რომ აქედან მაქსიმალური ორმხრივი სარგებელი მივიღოთ", — ამის შესახებ რუსეთის საგარეო საქმეთა მინისტრმა სერგეი ლავროვმა 19 თებერვალს სახელმწიფო სათათბიროში სამთავრობო საათზე განაცხადა.

მისი თქმით, აშშ-ის სახელმწიფო მდივანმა მარკო რუბიომ რუსეთთან მოლაპარაკების დროს აღნიშნა, რომ სახელმწიფოთა ინტერესებში განსხვავებებს არ უნდა მოჰყვეს "კონფრონტაციაში ჩავარდნა".

მინისტრმა დასძინა, რომ რუსული მხარე იმედოვნებს, რომ შეიქმნება პირობები შეერთებულ შტატებთან უსაფრთხოებისა და სტრატეგიული სტაბილურობის შესახებ მოლაპარაკებებისთვის. მან აღნიშნა, რომ მოძრაობა ყველა მიმართულებით ურთიერთობების ნორმალიზაციისკენ იწყება, ყოველ შემთხვევაში, მაშინ, როცა იქნება გამოცხადებული მზადყოფნა ამ მოძრაობის დასაწყებად.

გუშინ ერ-რიადიში უკრაინაში მიმდინარე ომის დასრულებაზე აშშ-ს და რუსეთის მაღალჩინოსნებმა იმსჯელეს. მოლაპარაკებაზე მიწვეული არ იყო უკრაინის პრეზიდენტი ვლადიმერ ზელენსკი. მისი თქმით, მიწვევის შემთხვევაშიც კი არ ჩავიდოდა შეხვედრაზე, რადგან უკრაინა არ მონაწილეობდა მის მომზადებაში. ზელენსკიმ აღნიშნა, რომ უკრაინა არ მიიღებს შეერთებულ შტატებსა და რუსეთს შორის მისი ქვეყნის ბედთან დაკავშირებით მიღწეულ რაიმე შეთანხმებებს, რომლებიც უკრაინელების მონაწილეობის გარეშე იქნება მიღებული.

აშშ-ს სახელმწიფო დეპარტამენტის განცხადების მიხედვით, მხარეები შემდეგ საკითხებზე შეთანხმდნენ:

"ჩამოყალიბდეს საკონსულტაციო მექანიზმი, რათა მოგვარდეს ორმხრივ ურთიერთობაში გამაღიზიანებელი ფაქტორები იმ მიზნით, რომ შესაბამისი დიპლომატიური მისიების საქმიანობის ნორმალიზებისთვის საჭირო ნაბიჯები გადაიდგას ;

შეიქმნას მაღალი დონის ჯგუფები, რათა რაც შეიძლება სწრაფად დაიწყოს მუშაობა უკრაინაში კონფლიქტის დამთავრებაზე ისე, რომ ეს იყოს მდგრადი, გრძელვადიანი და მისაღები ყველა მხარისთვის;

საფუძველი ჩაეყაროს სამომავლო თანამშრომლობას საერთო გეოპოლიტიკური ინტერესის მქონე საკითხებზე, ასევე ისტორიულ, ეკონომიკურ და საინვესტიციო შესაძლებლობებზე, რაც უკრაინაში კონფლიქტის წარმატებით დასრულების შედეგად აღმოცენდება;

მხარეებმა შეხვედრაზე პირობა დადეს, შეინარჩუნონ ერთმანეთთან წვდომა, რათა გარანტირებული იყოს, რომ პროცესი წინ დროულად და პროდუქტიულად წავიდეს".