2017 წლის იანვარ-აგვისტოში 100,3 მლნ აშშ დოლარის ღირებულების ღვინო გაიყიდა, რაც 55 პროცენტით აღემატება გასული წლის ამავე პერიოდის მაჩვენებელს. ინფორმაციას ღვინის ეროვნული სააგენტო ავრცელებს.

სააგენტოს ინფორმაციით, მსოფლიოს 44 ქვეყანაში ექსპორტირებულია 45,5 მლნ ბოთლი (0,75 ლ) ღვინო, რაც 61%-ით აღემატება გასული წლის ანალოგიურ მონაცემებს.

ღვინის ეროვნული სააგენტოს თავმჯდომარის, გიორგი სამანიშვილის თქმით, გაყიდვები გაიზარდა ევროკავშირის, სამხრეთ-აღმოსავლეთ აზიისა და აშშ-ს ბაზრების მიმართულებით, ხოლო ექსპორტიორი ქვეყნების პირველი ხუთეულია რუსეთი, ჩინეთი, უკრაინა, ყაზახეთი და პოლონეთი.

ექსპორტის მატება იყო შემდეგ ქვეყნებში:

  • ჩინეთი - 51 პროცენტი (5 098 091)
  • რუსეთი - 94 პროცენტი (28 493 063)
  • უკრაინა - 42 პროცენტი (4 334 970)
  • პოლონეთი - 19 პროცენტი (1 622 872)
  • ლატვია - 25 პროცენტი (963 266)
  • ბელარუსი - 35 პროცენტი (904 070)
  • აშშ - 67 პროცენტი (286 496)
  • გერმანია - 39 პროცენტი (256 672)
  • ისრაელი - 232 პროცენტი (139 994)
  • საფრანგეთი - 378 პროცენტი (95 530)
  • აზერბაიჯანი - 170 პროცენტი (102 342) და სხვა.

ღვინის ეროვნული სააგენტოს განცხადებით, მსოფლიოს 20 ქვეყანაში ექსპორტირებულია 9 758 746 ბოთლი (0,5 ლ) ბრენდი, რაც 103 პროცენტით აღემატება 2016 წლის ამავე პერიოდის მაჩვენებელს:

"სულ ექსპორტირებულია 21,85 მლნ აშშ დოლარის ღირებულების ბრენდი - მატება გასული წლის ანალოგიურ პერიოდთან შედარებით 98 პროცენტს აღწევს."

როგორც სააგენტოში ამბობენ, მსოფლიოს 17 ქვეყანაში ექსპორტირებულია 132 746 ბოთლი (0,5 ლ) ჭაჭა და ექსპორტის ზრდამ 153 პროცენტი შეადგინა:

"ჭაჭის ექსპორტით მიღებული შემოსავლები 367 757 აშშ დოლარს შეადგენს, ზრდამ გასული წლის ანალოგიურ პერიოდთან შედარებით 85 პროცენტს მიაღწია."

მთლიანობაში, ღვინის, ბრენდის, ჭაჭის, ღვინომასალისა და საბრენდე სპირტის ექსპორტის შედეგად მიღებული შემოსავლები იანვარ-აგვისტოში 165,34 მლნ აშშ დოლარს შეადგენს - ზრდამ 2016 წლის ამავე პერიოდთან შედარებით 52 პროცენტი შეადგინა.