საქართველოს მე-5 პრეზიდენტი, სალომე ზურაბიშვილი ოპოზიციური პარტიების ერთიანობა ნაციონალური მოძრაობის, გახარია საქართველოსთვის, კოალიცია ძლიერი საქართველოსა და კოალიცია ცვლილებისთვის წარმომადგენლებს ხვდება.

ოპოზიციური პარტიის ლიდერებმა დაადასტურეს, რომ შეხვედრა სალომე ზურაბიშვილის ინიციატივით იმართება, რათა მუშაობა ერთად გააგრძელონ.

"გაერთიანება, კოორდინაცია, საზოგადოების გამთლიანება, როდესაც ქვეყანა ასეთ კრიზისში იმყოფება, მნიშვნელოვანია ქვეყნის გადასარჩენად. კონკრეტულად რა საკითხს განვიხილავთ დღეს, ვერ გიპასუხებთ იმიტომ, რომ არ ვიცი, პრეზიდენტმა მოგვიწვია. წინა კვირას გვქონდა ძალიან კარგი შეხვედრა ევროპის წამყვანი ქვეყნების ელჩებთან და ვფიქრობ, ერთობლივი მუშაობა გაგრძელდება," — განაცხადა ბადრი ჯაფარიძემ.

შეხვედრაზე ასევე იმყოფება პარტია სამართლიანობისთვის ლიდერი, ეკა ბესელია, რომლის თქმითაც, ეს სამუშაო შეხვედრაა და მათ მრავალი განსახილველი თემა დაუგროვდათ.

"ეს არის სამუშაო შეხვედრა. პარტიებს ჰქონდათ სურვილი პრეზიდენტთან შეხვედრის. განსახილველი საკითხები რთულად გამოსაცნობი არაა რა შეიძლება იყოს. მეტი კონკრეტიკა შემიძლია, შეხვედრის დასრულების შემდეგ გითხრათ. რადგან სამუშაო და დახურული ფორმატის შეხვედრაა, ეს იმას ნიშნავს, რომ დიპლომატიური კორპუსი ამ შეხვედრას არ ესწრება. დაგროვდა საკითხები, რომელთა განხილვაც ამ ფორმატში საჭიროა.

სალომე ზურაბიშვილის როლი ცოტა დიდი და რთული საკითხია, თუმცა აქ ყველას თავისი ინდივიდუალური მიდგომა აქვს. მთავარია, რომ მიმდინარე საკითხებთან დაკავშირებით შეჯერდეს ხედვა და ამ ხედვის, ქმედებების ირგვლივ იყოს კარგი კოორდინაცია. სავალდებულო არაა, რომ ყველა ერთი ლექსიკონით საუბრობდეს. რაც შეეხება სალომე ზურაბიშვილის როლს, აქ პრეზიდენტს აქვს ძლიერი მაკოორდინებელი და შემაკავშირებელი როლი, ისევე როგორც მისი ფაქტორი გარეთ ჩვენი ქვეყნის მეგობრებისთვის, რომლებიც მას ესაუბრებიან. ამიტომაც, ეს პროცესი ამის გარეშე შეუძლებელია", — განაცხადა ეკა ბესელიამ.


შეგახსენებთ, 5 თებერვალს, საქართველოს მე-5 პრეზიდენტი, სალომე ზურაბიშვილი, ოპოზიციური პარტიის ლიდერებთან ერთად ევროკავშირის წევრი ქვეყნების ელჩებს შეხვდა. ზურაბიშვილმა განაცხადა რომ საქართველოს და მისი პარტნიორი ქვეყნების მთავარი მოთხოვნა ახალი არჩევნების ჩატარება იყო.