დღეს, 15:00 საათზე, საქართველოს მეხუთე პრეზიდენტი, სალომე ზურაბიშვილი, ოპოზიციური პარტიის ლიდერებთან ერთად ევროკავშირის წევრი ქვეყნების ელჩებს შეხვდა. ზურაბიშვილმა განაცხადა რომ საქართველოს და მისი პარტნიორი ქვეყნების მთავარი მოთხოვნა ახალი არჩევნების ჩატარებაა.

"ეს არის უკვე დიქტატურა, რუსული ყაიდის დიქტატურა. ჩვენი და ჩვენი პარტნიორი ქვეყნების მოთხოვნა უნდა იყოს ერთობლივი, რომ არჩევნები ჩატარდეს, იმიტომ, რომ პოლიტიკური ქმედება არის მხოლოდ და მხოლოდ ერთი — ეს არის ახალი არჩევნები, სხვა გზა არ არსებობს, გარდა არჩევნებისა და ძალიან სწორად, ძალიან ბრძნულად ჩვენმა საზოგადოებამ გაიგო, რომ ეს არის ერთადერთი მოთხოვნა, რაც შეიძლება არსებობდეს და რასაც შეიძლება ჩვენმა პარტნიორებმა დაუჭირონ მხარი," — განაცხადა საქართველოს პრეზიდენტმა სალომე ზურაბიშვილმა ევროკავშირის ელჩებთან შეხვედრის შემდეგ (სტილი დაცულია).

შეხვედრის შესახებ კომენტარი გააკეთა კოალიცია ცვლილებებისთვის, ერთ-ერთმა ლიდერმა, ელენე ხოშტარიამ. მისი თქმით, მათ ყველა იმ კონკრეტულ მექანიზმზე ისაუბრეს, რომელიც აუცილებელია, რომ "ამ [ოცნების] რეჟიმს ეტკინოს".

ხოშტარიამ ასევე აღნიშნა, რომ ელჩებს გააცნეს ინფორმაცია იმ არაკონსტიტუციური კანონების შესახებ, რომელიც გამიზნულია ადამიანების დასაჩაგრად და საცემად.

"მნიშვნელოვანი იყო ჩვენი ერთიანი შეხვედრა - ოთხივე კოალიცია და პრეზიდენტი ერთად. ჩვენ შევხვდით წევრი ქვეყნების ელჩებს. რა თქმა უნდა, მთავარი სათქმელი არის პოლიტპატიმრები, რომელთა რაოდენობაც იზრდება. წნეხი აუცილებელია ჩვენი პარტნიორების მხრიდან, ასევე მნიშვნელოვანია ახალი არჩევნები.
დეტალები გავაცანით იმ არაკონსტიტუციური კანონების შესახებ, რომელიც გამიზნულია ადამიანების დასაჩაგრად, საცემად და ასე შემდეგ. ვისაუბრეთ, თუ რას ელოდება ხალხი ევროპელი პარტნიორებისგან. ვისაუბრეთ ყველა კონკრეტულ მექანიზმზე, რომელიც აუცილებელია, რომ ეტკინოს ამ რეჟიმს," — განაცხადა ელენე ხოშტარიამ.

კოალიცია ცვლილებებისთვის, ლიდერმა ასევე განმარტა, რომ ქართული ოცნების ყოველი ნაბიჯი არაკონსტიტუციურია.

"არ არის პარლამენტი, იქ რაღაცას ბოდიალობენ. არაკონსტიტუციურია ყველაფერი, რასაც ისინი აკეთებენ. ამას არავინ ემორჩილება. ნახეთ, ნიღაბი იქნება, გზა, ქუჩა, რასაც მოიგონებენ, თუ მეზობელთან გადასვლის კრიმინალიზაციას გააკეთებენ, ამას არავინ ემორჩილება. არც დავემორჩილებით. ეს არ არის არც პარლამენტი, არც საკანონმდებლო პროცესი, არის სრულიად არაკონსტიტუციური,— აღნიშნა ხოშტარიამ.

შეხვედრას მეხუთე პრეზიდენტთან ერთად, ძლიერი საქართველოს, კოალიცია ცვლილებისთვის, გახარია საქართველოსთვის და ერთიანობა — ნაციონალური მოძრაობის ლიდერები ესწრებოდნენ.