"უბრალოდ ჩვენი სოლიდარობა გამოვთქვით, თურმე სოლიდარობა ისჯება, რაც ძალიან სამწუხაროა", — ამის შესახებ ქუთაისის საქალაქო სასამართლოსთან, პროცესის დაწყებამდე მასწავლებელმა, ვლადიმერ აფხაზავამ ტელეკომპანია მთავართან თქვა. ის ერთ-ერთია იმ 9 პირიდან, რომელსაც 26 იანვარს, მოსამართლის სახლთან 20-წუთიანი საპროტესტო შეკრების გამო შსს-მ ადმინისტრაციული სამართალდარღვევის ოქმი შეუდგინა.

აფხაზავას თქმით, უბრალო ადამიანებს უნდა ჰქონდეთ გასაპროტესტებელი ადგილი, სადაც გულწრფელი პროტესტის გამოთქმას შეძლებენ.

"ძალიან სამწუხაროა, დღეს გაკვეთილზე უნდა ვყოფილიყავი და მიწევს სასამართლოზე მოვიდე. არ მეგონა და მზია ამაღლობელის სოლიდარობა თუ ასე ძვირი დაჯდებოდა. ამიტომაც არის რომ უბრალო ადამიანებს უნდა გვქონდეს გასაპროტესტებელი ადგილი, რითაც შეიძლება რომ გულწრფელი პროტესტი გამოთქვა. მე ასეთ მშვიდ აქციაზე არასდროს ვყოფილვარ. ძალიან მოკლე დროით იყო [აქცია]. არც ცუდი სიტყვები გითქვამს, უბრალოდ ჩვენი სოლიდარობა გამოვთქვით, თურმე სოლიდარობა ისჯება, რაც ძალიან სამწუხაროა", — თქვა ვლადიმერ აფხაზავამ მთავართან.

მუსიკოს ნინო ქათამაძის თქმით, რომელზეც შსს-მ ასევე შეუდგინა ადმინისტრაციული სამართალდარღვევის ოქმი, ამბობს, რომ ხალხში უსამართლობის განცდაა დაგროვილი, რომელიც ვერ შეჩერდება.

"კონცერტი სად არ მქონია, მქონია მარილის შახტაში, 84 მ სიღრმეში, მაგრამ კონცერტი არ მქონია სასამართლო დარბაზში, ანუ აქამდე არ მოვხვედრივარ. ეს იუმორით... მაგრამ ყველაზე მტკივნეული ამ შემთხვევაშია არის ის, რომ თავისუფალი სიტყვა, თავისუფალი ხმა ისმის და [ხალხი] არ ჩერდება. იმდენი დაგროვდა ეს უსამართლობის განცდა, მზიას თემა, თემურ ქათამაძის შიმშილობა და ძალიან ბევრი მოვლენები დაგროვდა, არ ვიცი ეს ხმა როგორ უნდა გაჩერდეს", — თქვა ნინო ქათამაძემ.

ადგილზე მყოფი ადვოკატის, მარიმა პატარიძის თქმით, 6 თებერვალს ამოქმედებული საკანონმდებლო ცვლილებებით აღნიშნული ქმედება ითვალისწინებს როგორც 60 დღემდე პატიმრობას, ასევე ჯარიმას 5000 ლარის ოდენობით.

შეგახსენებთ, რომ ქუთაისის საქალაქო სასამართლოში, ჟურნალისტების, ფსიქოლოგების, მუსიკოსების და სხვადასხვა პროფესიის წარმომადგენლების, სულ 9 პირის სასამართლო პროცესი მიმდინარეობს.

მზია ამაღლობელის პატიმრობასთან დაკავშირებით, ქუთაისში, 26 იანვარს მოსამართლის სახლთან 20-წუთიანი საპროტესტო შეკრების გამო შსს-მ 9 პირს ადმინისტრაციული სამართალდარღვევის ოქმი შეუდგინა. მათ შორის არიან: მთის ამბების დამფუძნებელი გელა მთივლიშვილი, ქუთაისი პოსტის ჟურნალისტი ეკა კუხალაშვილი, მუსიკოსი ნინო ქათამაძე, მასწავლებელი ვლადიმერ აფხაზავა, ჟურნალისტი ხვიჩა ვაშაყმაძე, ფსიქოლოგები ქეთევან ფილაური და მაია ცირამუა, სამოქალაქო აქტივისტი ირინა ზარანდია, ლანჩხუთის საკრებულოს წევრი გივი ცინცაძე.