აშშ-ის სახელმწიფო მდივანი მარკ რუბიო სოციალურ პლატფორმა X-ზე დონალდ ტრამპის განცხადებას გამოეხმაურა. რუბიოს თქმით, ამერიკა მზადაა დაეხმაროს ღაზას "ჰამასისგან" თავისუფლების მოპოვებაში და მათი სწრაფვა ხანგრძლივი მშვიდობაა.

"ღაზა ჰამასისგან თავისუფალი უნდა იყოს. როგორც დღეს პრეზიდენტმა ტრამპმა განაცხადა, აშშ მზადაა ეს პროცესი წარმართოს და ღაზა კვლავ მშვენიერი გახადოს. ჩვენ რეგიონში ყველასთვის ხანგრძლივი მშვიდობისკენ ვისწრაფვით", — წერს მარკო რუბიო.

შეგახსენებთ, რომ აშშ-ის პრეზიდენტმა დონალდ ტრამპმა განაცხადა, რომ ამერიკა ღაზას საკუთარი კონტროლის ქვეშ მოაქცევს, მის განიარაღებასა და უსაფრთხოებაზე იზრუნებს.

"აშშ საკუთარი კონტროლის ქვეშ მოაქცევს ღაზას და ჩვენ შევასრულებთ სამუშაოს. პასუხისმგებელი ვიქნებით ადგილზე არსებული ყველა საშიში აუფეთქებელი ბომბისა და სხვა იარაღის დემონტაჟზე, მოვაშორებთ დანგრეულ შენობებს. შევქმნით ეკონომიკურ განვითარებას, რომელიც უზრუნველყოფს შეუზღუდავი რაოდენობის სამუშაო ადგილებს და საცხოვრებელს ამ ტერიტორიის მოსახლეობისთვის. ჩავატარებთ ნამდვილ სამუშაოს", — განაცხადა ტრამპმა ისრაელის პრემიერ-მინისტრთან, ბენიამინ ნეთანიაჰუსთან ერთად გამართულ პრესკონფერენციაზე.