სპეციალური პენიტენციური სამსახური ბათუმელების ადა ნეტგაზეთის თანადამფუძნებლისა და დირექტორის, მზია ამაღლობელის კლინიკაში "ვივამედში" გადაყვანასთან დაკავშირებით განცხადებას ავრცელებს.

უწყება წერს, რომ ამაღლობელმა განაცხადა თანხმობა სპეციალური პენიტენციური სამსახურის ექიმ-სპეციალისტების მიერ რეკომენდებული კვლევებისა და პროცედურის ჩატარებაზე.

სპეციალური პენიტენციური სამსახური ცალკეულ პოლიტიკურ ჯგუფებსა და მედიასაშუალებებს მოუწოდებს, რომ თავი შეიკავონ ზემოაღნიშნული ფაქტების საწინააღმდეგოდ მიზანმიმართულად მცდარი ინფორმაციის გავრცელებისგან.

"სპეციალური პენიტენციური სამსახური ეხმიანება ცალკეული მედიასაშუალებების მიერ გავრცელებულ ინფორმაციას, ბრალდებულ მ.ა.-ს კლინიკა "ვივამედში" გადაყვანასთან დაკავშირებით.

ბრალდებული მ.ა. სამოქალაქო სექტორის კლინიკა "ვივამედში" გადაყვანილია მისი თანხმობით, ანამნეზის შესაბამისი სამედიცინო კვლევების ჩასატარებლად.

ბრალდებულმა კლინიკაში მოთავსების შემდგომ დამატებით განაცხადა თანხმობა სპეციალური პენიტენციური სამსახურის ექიმ-სპეციალისტების მიერ რეკომენდებული კვლევებისა და პროცედურის ჩატარებაზე.

ბრალდებული მ.ა. ამ ეტაპზე, რჩება კლინიკაში დაგეგმილი სხვა ლაბორატორულ-ინსტრუმენტული კვლევების ჩასატარებლად.

განვმარტავთ, რომ განხორციელებული რეფერალის საჭიროების შესახებ ინფორმირებული იყო ბრალდებულის უფლებადამცველი.

მოვუწოდებთ ცალკეულ პოლიტიკურ ჯგუფებსა და მედიასაშუალებებს, თავი შეიკავონ ზემოაღნიშნული ფაქტების საწინააღმდეგოდ მიზანმიმართულად მცდარი ინფორმაციის გავრცელებისგან", — ნათქვამია განცხადებაში.

მზია ამაღლობელი კლინიკაში 4 თებერვალს გადაიყვანეს. როგროც "ფორმულასთან" საუბარში "ვივამედის" დირექტორმა, ზურაბ ჩხაიძემ განაცხადა, პაციენტს ჩაუტარდა აუცილებელი ლაბორატორიული და ინსტრუმენტული კვლევები. ანალიზის შედეგების ნახვის შემდეგ, პაციენტი აგრძელებს მკურნალობას სტაციონარის პირობებში.

"...კლინიკა "ვივამედში" საღამოს საათებში შემოყვანილი იქნა პაციენტი მზია ამაღლობელი. მას ჩაუტარდა აუცილებელი ლაბორატორიული და ინსტრუმენტული კვლევები. ანალიზის შედეგების ნახვის შემდეგ, პაციენტი აგრძელებს მკურნალობას სტაციონარის პირობებში.

პაციენტი ჩვენთან შემოვიდა კონტაქტური, ადეკვატური, გონების კარგვის ეპიზოდი კლინიკაში არ ყოფილა. მისი გადმოცემით, მას არ აღუნიშნავს გონების კარგვის ეპიზოდი. მას ჰქონდა გარკვეული ჩივილები, რაც ზოგადად ახასიათებს შიმშილის ეფექტს და აქედან გამომდინარე, ჩატარებული იქნა ყველა აუცილებელი კვლევა, რაც საჭიროა ამ კონკრეტულ შემთხვევაში. ჩივილებს, რაც დამახასიათებელია, კონკრეტულად ვერ დაგისახელებთ, მაგრამ რაც ზოგადად ახასიათებს შიმშილის ეფექტს. სტაბილურია, კონტაქტურია.

შეთავაზებული იქნა ინფუზიური თერაპია, რასაც პაციენტი დათანხმდა და ჩაუტარდა. შეფასდება მისი მდგომარეობა და მდგომარეობიდან გამომდინარე შემდეგ უკვე გეტყვით, რა და როგორ, ანუ, გადაწყდება, გააგრძელებს კიდევ რამდენიმე დღე [კლინიკაში მკურნალობას] თუ როგორ იქნება.

რა თქმა უნდა, გარკვეული ცვლილებები არის ანალიზებში, კიდევ განვმეორდებით, ჩაუტარდება ლაბორატორიული კვლევები, თუ საჭირო გახდება, ინსტრუმენტული კვლევებიც და მისი მდგომარეობის შესაბამისად, შემდგომ გადაწყდება მკურნალობის ტაქტიკა და ხანგრძლივობა" — განაცხადა "ფორმულასთან" საუბარში "ვივამედის" დირექტორმა, ზურაბ ჩხაიძემ.