საქართველოს მე-5 პრეზიდენტი, სალომე ზურაბიშვილი, X-ზე ეხმაურება ქართული ოცნების მიერ დაინიციირებულ საკანონმდებლო ცვლილებებს, რომლებიც სისხლის სამართლის კოდექსსა და ადმინისტრაციულ სამართალდარღვევათა კოდექსში არაერთი სანქციის გამკაცრებას ითვალისწინებს და პოლიტიკური პროტესტის წინააღმდეგაა მიმართული.

"ივანიშვილის არალეგიტიმური პარლამენტი ახალ კანონებსა და შესწორებებს იღებს, რომელთა მიზანი განსხვავებული აზრისა და პროტესტის ჩახშობაა. საზოგადო მოწოდება "ძალადობრივი ქმედებებისკენ" 3-დან 6 წლამდე პატიმრობით დაისჯება, ხოლო სახელმწიფო თანამდებობის პირის ან საჯარო მოხელის სიტყვიერი შეურაცხყოფა მის საქმიანობასთან დაკავშირებით, კლასიფიცირებული იქნება ადმინისტრაციულ სამართალდარღვევად მკაცრი სასჯელით. მიუხედავად ამისა, მამაც ქართველებს ეს ტაქტიკა ვერ გააჩუმებს. ჩვენი სწრაფვა თავისუფლებისკენ, დემოკრატიისკენ და სამართლიანობისკენ ურყევი რჩება.

თუმცა, ჩვენ ამას მარტო ვერ შევებრძოლებით. გვჭირდება საერთაშორისო საზოგადოების მხარდაჭერა და გვერდით დგომა ამ ავტორიტარული ზომებისა და საქართველოში გამეფებული ტერორის წინააღმდეგ", — წერს სალომე ზურაბიშვილი X-ზე.

ასევე იხილეთ: იურიდიულ საკითხთა კომიტეტმა პირველი მოსმენით, დაჩქარებული წესით განიხილა და მხარი დაუჭირა ცვლილებებს როგორც სისხლის, ისე ადმინისტრაციულ სამართალდარღვევათა კოდექსში