პროტესტის ნიშნად შინაგან საქმეთა სამინისტროდან წამოსული გიორგი გოგინაშვილი Facebook-ზე პოსტს აქვეყნებს. გოგინაშვილი წერს, რომ პოლიცია არ არის პოლიტიკურად ნეიტრალური და "კანონი პოლიციის შესახებ" ფეხქვეშ გათელეს.

"პოლიცია არ არის პოლიტიკურად ნეიტრალური. ფეხქვეშ გათელეს: "კანონი პოლიციის შესახებ"

ფეხქვეშ გათელეს საქართველოს კონსტიტუცია.

ადამიანების დაკავება მოხდა გადაჭარბებული ძალის გამოყენებით, ცემით, ღირსების შელახვით, სიტყვიერი შეურაცხყოფით. მათ შორის ფიზიკურად იძალადეს და სიტყვიერი შეურაცხყოფა მიაყენეს ქალებსა და ჟურნალისტებს. თუ პოლიციელის ფორმა გაცვია, აღმაშენებელის ხეივანზე დგახარ და ამ ყველაფერს გვერდიდან უყურებ იცოდე რომ შენც ამ ყველაფრის თანამონაწილე ხარ, თუ ჩემი არ გჯერა, დროა გადაიკითხო "კანონი პოლიციის შესახებ". პოლიცია აღარ ასოცირდება სამართალდამცველთან. პოლიცია უგულებელჰყოფს კონსტიტუციას და ბრმად ემორჩილება ზემდგომის მითითებას მიუხედავად იმისა რომ "კანონი პოლიციის შესახებ" ამბობს:

"პოლიციელმა უარი უნდა თქვას აშკარად უკანონო ბრძანების ან განკარგულების შესრულებაზე, თუ მან იცოდა ან უნდა სცოდნოდა მისი უკანონობის შესახებ, და უნდა იმოქმედოს კანონის ფარგლებში. პოლიციელმა აშკარად უკანონო ბრძანების ან განკარგულების მიღების შემთხვევაში უნდა აცნობოს სამინისტროს გენერალურ ინსპექციას ან პროკურორს. პოლიციელს, რომელიც უარს ამბობს, შეასრულოს აშკარად უკანონო ბრძანება ან განკარგულება, პასუხისმგებლობა არ დაეკისრება; პოლიციელისთვის აშკარად უკანონო ბრძანების ან განკარგულების მიმცემ პირს დაეკისრება პასუხისმგებლობა კანონით დადგენილი წესით".

ღირსებაზე აქვთ ხელი აღებული, ქართველობა აქვთ დაკარგული. ისტორია გაარჩევს ყველაფერს, ისტორია იტყვის თავის სათქმელს და შეგრცხვებათ საკუთარი შვილების, შვილიშვილების. თქვენს შვილებს შერცხვებათ თქვენი. უბრალოდ ერთი წამით გაიხადეთ ფორმა და გვერდიდან შეხედეთ ამ ყველაფერს.

რას გავხართ? რანაირად არ გრცხვენიათ. გაიხსენეთ, აკადემიაში რასაც გასწავლიდნენ ის ხართ? პოლიციის ფორმას რომ იცმევდით ისეთ პოლიციელობაზე ოცნებობდით როგორიც დღეს ხართ?

ბიძინამ რომ თქვას დღეს ყველა ვკეტავთ აღმაშენებელის ხეივანსო მასაც ასე დასჯით? მართლა ფიქრობთ რომ ქვეყნის სამსახურში ხართ?", — წერს გიორგი გოგინაშვილი.