"ხვალ თბილისის შემოსასვლელი გზის გადაკეტვა სისხლის სამართლის დანაშაული არ არის", — ამის შესახებ სოციალურ ქსელში ადვოკატი ბექა ბასილაია წერს და შსს-ს განცხადებას ეხმაურება, რომლითაც უწყებამ საზოგადოება გააფრთხილა, რომ სტრატეგიული ან განსაკუთრებული მნიშვნელობის ობიექტის ბლოკირება დასჯადი ქმედებაა და 2 წლამდე ვადით პატიმრობას ითვალისწინებს, აღნიშნული ქმედების ჯგუფურად ჩადენაზე კი 2-დან 4 წლამდე თავისუფლების აღკვეთაა.

"ხვალ თბილისის შემოსასვლელი გზის გადაკეტვა სისხლის სამართლის დანაშაული არ არის:

1. საქართველოს სისხლის სამართლის კოდექსის 222-ე მუხლი (სტრატეგიული ობიექტის ბლოკირება) არის ბლანკეტური ნორმა, რაც გულისხმობს, რომ ამ დანაშაულის შემადგენლობის ობიექტური მხარე განსაზღვრულია სხვა ნორმატიული აქტით, მოცემულ შემთხვევაში მთავრობის დადგენილებით, რომლითაც დამტკიცებულია სტრატეგიული ობიექტების ნუსხა;

2. სისხლის სამართლებრივი მიზნებისთვის, მთავრობის დადგენილებაში შესული ცვლილებები, სისხლის სამართლის კოდექსის 222-ე მუხლში შეტანილ ცვლილებას ნიშნავს.

3. სისხლისსამართლებრივი მიზნებისთვის, დადგენილებაში შეტანილი ცვლილების ძალაში შესასვლელად საჭიროა იგივე ვადები, რაც სისხლის სამართლის კანონის ცვლილების ძალაში შესვლას სჭირდება.

4. "ნორმატიული აქტების შესახებ" საქართველოს კანონის 23-ე მუხლის მე-3 ნაწილის თანახმად, "საქართველოს საკანონმდებლო აქტი ძალაში შედის ოფიციალურად გამოქვეყნებიდან მე-15 დღეს, თუ თვით ამ საკანონმდებლო აქტით სხვა ვადა არ არის დადგენილი".

5. მთავრობის დადგენილებაში შეტანილი ცვლილება გამოქვეყნდა 31 იანვარს, რაც ნიშნავს, რომ სისხლისსამართლებრივი მიზნებისთვის მისი გამოყენება დაუშვებელია 15 თებერვლამდე. ხვალ 2 თებერვალია.

ეს მსჯელობა არ არის კანონების ჩემეული ინტერპრეტაცია, რაც ზემოთ დავწერე აქსიომაა. ანალოგიური შემთხვევაა, პირდაპირ სისხლის სამართლის კოდექსის რომელიმე მუხლს რომ დაემატოს ახალი შემადგენლობა, ასეთ დროს ხომ უთუმცაოდ გამოქვეყნებიდან 15 დღიანი ვადა ჩაირთვება ცვლილების ძალაში შესასვლელად ?!

პ.ს. რუსეთის მსახური ოლიგარქიული რეჟიმის პირობებში, ხშირად იურიდიული აქსიომები არ მუშაობს, შსს უკვე დაგვემუქრა, ხვალ მოლთან გზის გადაკეტვის გამო დაგიჭერთო — წერს ბექა ბასილაია.

შეგახსენებთ, რომ მთავრობამ 2024 წლის 26 ოქტომბრის საპარლამენტო არჩევნებამდე 3 დღით ადრე მიიღო დადგენილება, რომლის მიხედვითაც რიგი ადმინისტრაციული შენობებისა და სტრატეგიული ობიექტების ბლოკირებაც პატიმრობით დაისჯება. ამ ჩამონათვალში მოხვდა პარლამენტი, ცენტრალური საარჩევნო კომისია, მთავრობის ადმინისტრაცია, და საპატრიარქო. ამ სიას, 2025 წლის 31 იანვრის დადგენილებით საერთაშორისო მნიშვნელობის საავტომობილო გზები დაემატა.

აღნიშნული კანონის მიხედვით, სტრატეგიული ან განსაკუთრებული მნიშვნელობის ობიექტის ხელში ჩაგდება ან ბლოკირება, რამაც შეიძლება შეაფერხოს ამ დაწესებულების ან ობიექტის ნორმალური მუშაობა, ორ წლამდე პატიმრობით ისჯება, იგივე ქმედება ჯგუფურად კი — ორიდან ოთხ წლამდე პატიმრობით. ხოლო სტრატეგიული ან განსაკუთრებული მნიშვნელობის ობიექტის ხელში ჩაგდება ან ბლოკირება ტერორისტული მიზნით ისჯება 10-დან 15 წლამდე პატიმრობით.

განახლება:

NEWS.On.ge-სთან საუბრისას იურისტი ნიკა სიმონიშვილი ამბობს, რომ მთავრობის მიერ 31 იანვარს მიღებული დადგენილება, რომლითაც გაფართოვდა სტრატეგიული და განსაკუთრებული მნიშვნელობის მქონე ობიექტების ნუსხა და მათ სიაში შევიდა საერთაშორისოდ მნიშვნელოვანი საავტომობილო გზები, ძალაში 1-ლი თებერვლიდან შედის.

ამის მიუხედავად, სიმონიშვილის თქმით, დადგენილების შინაარსი არაკონსტიტუციურია, რადგან ეს არის ბლანკეტური აკრძალვა შეკრების თავისუფლების ნაწილში და პრობლემურია კონსტიტუციური თვალსაზრისითაც, რადგან სისხლის სამართლის კოდექსი და მისი შინაარსი შეიცვალა კანონქვემდებარე ნორმატიული აქტით, რაც სრულიად არაკონსტიტუციური და დაუშვებელი პრინციპია.