ოცნების პარლამენტის თავმჯდომარე შალვა პაპუაშვილი "ფსიქიკური ჯანმრთელობის შესახებ" კანონში ცვლილებაზე აცხადებს, რომ "არ შეიძლება ადამიანის ჯანმრთელობის თემა გამოიყენონ პოლიტიკური სპეკულაციისთვის. მისი თქმით, "ვხედავთ პოლიტიკურ სპიკერებს, რომლებიც შეიძლება პროფესიით ექიმები არიან და ამას იყენებენ პარტიის წევრები პოლიტიკური მიზნისთვის".

"ამაზე კიდევ უფრო სენსიტიური თემები გროვდება სახელმწიფოს მხრიდან, ვინაიდან სახელმწიფო, მათ შორის, სერვისების გაწევის დროს იღებს ბევრ ინფორმაციას. ამიტომ გვაქვს ჩვენ პერსონალურ მონაცემთან დაცვის კანონი, ამიტომ არის განსაკუთრებული კატეგორიის პერსონალური მონაცემები, რომელიც დაცულია.

ბევრი სენსიტიური მონაცემი არის, მათ შორის, ჯანმრთელობის მხრივაც, როდესაც პაციენტები მიდიან და სახელმწიფო დაფინანსებით მკურნალობას იტარებენ, ეს ინფორმაციაც ხომ აქვს სახელმწიფოს, როცა მიმართავენ, რაღაც დაფინანსებას იღებენ, თანხმობას იღებენ დამატებით დაფინანსებაზე, ამიტომ აქ არაფერი განსაკუთრებული არ ხდება.

დღეს, ფსიქიკური ჯანმრთელობის მხრივ პრობლემა თუ აქვს, სხვა მხრივ პრობლემა თუ აქვს და რომ მიმართავს ჯანდაცვის სამინისტროს დაფინანსებაზე, ის ჯანდაცვის სამინისტრო არ იგებს რა პრობლემები აქვს? არ აქვს ეს ინფორმაცია?

ეს არის აბსოლუტური სპეკულაცია, არ შეიძლება ადამიანის ჯანმრთელობის თემა განსაკუთრებით ჯანდაცვის მუშაკებმა გამოიყენონ პოლიტიკური სპეკულაციისთვის და მათ შორის, ვხედავთ პოლიტიკურ სპიკერებს, რომლებიც შეიძლება პროფესიით ექიმები არიან და ამას იყენებენ პარტიის წევრები, რომლებიც ახლა პოლიტიკური მიზნისთვის იყენებენ ამ საკითხს.

კიდევ ერთხელ — სახელმწიფოს ბევრი სენსიტიური მონაცემი აქვს ზოგადად და სახელმწიფოს პასუხისმგებლობაა, რა თქმა უნდა, მსგავსი სენსიტიური მონაცემები დაცული იყოს მე არ მგონია, რომ დღემდე ვინმეს პრეტენზია წარედგინა რომელიმე უწყებისთვის, რომ მსგავსი კატეგორიის პერსონალური მონაცემები დაცული არ არის. პირიქით, ჩვენ უფრო მედიის მხრიდან ვხედავთ ხოლმე, სამწუხაროდ, პერსონალურ და მათ შორის, განსაკუთრებული მნიშვნელობის პერსონალური ინფორმაციის გამჟღავნებას ხოლმე," — თქვა შალვა პაპუაშვილმა.

ცნობისთვის, ოცნების პარლამენტის გადაწყვეტილებით 2026 წლის 1-ელ მარტამდე უნდა შეიქმნას "ფსიქიკური ჯანმრთელობის პრობლემის მქონე, ალკოჰოლიზმით, ნარკომანიით ან/და ტოქსიკომანიით დაავადებულ პირთა ერთიან საინფორმაციო ბაზა" — "ფსიქიკური ჯანმრთელობის შესახებ" კანონპროექტში ამ ცვლილებაზე და ამ ბაზის შექმნაზე პასუხისმგებელი ოცნების ხელისუფლების ოკუპირებული ტერიტორიებიდან დევნილთა, შრომის, ჯანმრთელობისა და სოციალური დაცვის სამინისტროა, ცვლილებების ინიციატორი კი შინაგან საქმეთა სამინისტროა.

კანონპროექტში ცვლილებების მიხედვით, დევნილთა სამინისტროს ევალება:

  • პირის ფსიქიკური ჯანმრთელობის შესახებ ჯანმრთელობის პრობლემის მქონე, ალკოჰოლიზმით, ნარკომანიით ან/და ტოქსიკომანიით დაავადებულ პირთა ერთიან საინფორმაციო ბაზაში მონაცემები შეტანა;
  • ფსიქიკური ჯანმრთელობის პრობლემის მქონე პირების შესახებ მონაცემების შესაბამისი სახელმწიფო და კერძო დაწესებულებებისგან მოპოვება;
  • აღნიშნულ ბაზაში მონაცემების შეტანის კრიტერიუმების
  • შემუშავება.