იურისტ ნიკა სიმონიშვილის თქმით, მთავრობის მიერ 31 იანვარს მიღებული დადგენილება, რომლითაც გაფართოვდა სტრატეგიული და განსაკუთრებული მნიშვნელობის მქონე ობიექტების ნუსხა და მათ სიაში შევიდა საერთაშორისოდ მნიშვნელოვანი საავტომობილო გზები, ძალაში 1-ლი თებერვლიდან შედის. ამის შესახებ მან NEWS.On.ge-სთან საუბრისას თქვა.

• "ოცნებამ" ავტობანი სტრატეგიული მნიშვნელობის ობიექტების ნუსხაში შეიყვანა — მისი ბლოკირება 4 წლამდე პატიმრობას ითვალისწინებს

ამის მიუხედავად, სიმონიშვილის თქმით, დადგენილების შინაარსი არაკონსტიტუციურია, რადგან ეს არის ბლანკეტური აკრძალვა შეკრების თავისუფლების ნაწილში და პრობლემურია კონსტიტუციური თვალსაზრისითაც, რადგან სისხლის სამართლის კოდექსი და მისი შინაარსი შეიცვალა კანონქვემდებარე ნორმატიული აქტით, რაც სრულიად არაკონსტიტუციური და დაუშვებელი პრინციპია.

"საქართველოს მთავრობამ 2025 წლის 31 იანვარს მიიღო დადგენილება, რომლითაც ცვლილება შეიტანა სტრატეგიული და განსაკუთრებული მნიშვნელობის მქონე ობიექტების ნუსხაში და შესაბამისად აქ საერთაშორისოდ მნიშვნელოვანი საავტომობილო გზები შეიყვანა სტრატეგიული და განსაკუთრებული მნიშვნელობის მქონე ობიექტების ნუსხაში, რითაც მივიღეთ შემთხვევა და სისხლის სამართლის კოდექსით დადგენილი მოცემულობა, რომ სტრატეგიული და განსაკუთრებული მნიშვნელობის მქონე ობიექტების ბლოკირება ან ხელში ჩაგდება არის დანაშაული, ეს მოცემულობა შეიცვალა იმით, რომ ასევე საერთაშორისო გზების ბლოკირება ჩაითვლება სისხლის სამართლის დანაშაულად.

რაც შეეხება ამოქმედების ვადებს — ერთი ის, რომ სრულიად მიუღებელი პრინციპია და არაკონსტიტუციური, რომ კანონქვემდებარე აქტით ხდება სისხლის სამართლის დანაშაულის შინაარსის გაფართოება. ანუ მთავრობამ დადგენილებით გააფართოვა შინაარსი სისხლის სამართლის დანაშაულის და არა საკანონმდებლო ცვლილების, რაც თავის მხრივ სრული ანომალია და აბსურდი და არაკონსტიტუციური პრინციპია, მაგრამ თუ ჩვენ წმინდა ფორმალურად შევხედავთ როდის არის ეს ყველაფერი ამოქმედებული, ამ დადგენილებაში, რომელიც 31 იანვარსაა მიღებული, პირდაპირ წერია, რომ დადგენილება ამოქმედებულია გამოქვეყნებისთანავე, ანუ 1-ლი თებერვლიდან ეს დადგენილება არის ძალაში და ახალი შინაარსი სისხლის სამართლის კანონმდებლობის უკვე ძალაშია 1-ლი თებერვლიდან და არა მე-15 დღიდან, რადგან ნორმატიული აქტების შესახებ კანონში პირდაპირ არის მითითება, რომ მე-15 დღეს ძალაში შედის მხოლოდ საკანონმდებლო აქტები, ეს არ არის საკანონმდებლო აქტი, კანონი არ არის, ეს არის კანონქვემდებარე ნორმატიული აქტი, რომელზედაც პირდაპირ წერია ნორმატიული აქტების შესახებ ორგანულ კანონში, რომ გამოქვეყნებისთანავე შედის პირდაპირ ძალაში და შესაბამისად, ეს ნორმატიული აქტი 1-ლი თებერვლიდანაა ძალაში.

მაგრამ კიდევ ერთხელ ვიტყოდი იმას, რომ, მართალია, ფორმალურად არის ძალაში შესული 1-ლი თებერვლიდან, მაგრამ მისი შინაარსი არაკონსტიტუციურია, რადგან ეს არის ბლანკეტური აკრძალვა შეკრების თავისუფლების ნაწილში და მეორე — პრობლემურია კონსტიტუციური თვალსაზრისით - ამ შემთხვევაში სისხლის სამართლის კოდექსი და მისი შინაარსი შეიცვალა კანონქვემდებარე ნორმატიული აქტით, რაც სრულიად არაკონსტიტუციური და დაუშვებელი პრინციპია", — განაცხადა ნიკა სიმონიშვილმა.