ოცნების ხელისუფლების პარლამენტის თავმჯდომარე შალვა პაპუაშვილის განცხადებით, "არანაირი პრობლემა არა არის" იმაში, რომ ირაკლი კობახიძე და ვლადიმერ პუტინი "მშვიდობის საკითხისთვის მიძღვნილ ფორუმზე ერთად იმყოფებიან.

პაპუაშვილის განმარტებით, ირაკლი კობახიძე იმყოფება ფორუმზე, რომელიც ეძღვნება მშვიდობის საკითხებს, ხოლო ფორუმის მონაწილეებს თავად მასპინძელი განსაზღვრავს.

"საქართველოს პრემიერმინისტრი იმყოფება თურქმენეთში, თურქმენეთის პრეზიდენტის მიწვევით ფორუმზე, რომელიც მშვიდობის საკითხებს ეძღვნება. ფორუმის მონაწილეებს თავად მასპინძელი განსაზღვრავს. საქართველოს პრემიერ-მინისტრი იქ წარმოადგენს საქართველოს", — განაცხადა შალვა პაპუაშვილმა.

ჟურნალისტების კითხვაზე სავალდებულო იყო თუ არა რუსეთთან ერთად ქართული მხარის ყოფნა ამ ფორუმზე — პაპუაშვილმა უპასუხა, რომ "პატივისცემა არ არის ვალდებულება" და ირაკლი კობახიძე ფორუმზე თურქმენეთის მშვიდობისადმი მიძღვნილ 30 წლისთავზე იმყოფებოდა.

ჟურნალისტის კითხვაზე, ხედავენ თუ არა რუსეთის პრეზიდენტთან საუბრის რესურსს?, შალვა პაპუაშვილმა უპასუხა, რომ მოქმედებენ მხოლოდ ეროვნული ინტერესებით.

"შალვა პაპუაშვილი: საქართველოს ხელისუფლებამ ერთი რამე დაამტკიცა, განსაკუთრებით ბოლო წლების განმავლობაში — ჩვენ ვმოქმედებთ მხოლოდ ქართველი ხალხის ეროვნული ინტერესებით და ვინც პატივს სცემს ამ ინტერესებს, მზად ვართ ვესაუბროთ ყველას. ქართველი ხალხის ეროვნული ინტერესი არის ორი მთავარი ეროვნული ამოცანა: ეს არის ჩვენი ქვეყნის გამთლიანება და ჩვენი ხალხის კეთილდღეობის ზრდა. ჩვენ ვმოქმედებთ ჩვენი ხალხის ინტერესებიდან გამომდინარე. ვინც პატივს სცემს ამ ინტერესებს, მათ ვესაუბრებით. ვინ პატივს არ სცემს, არ ვესაუბრებით.

ჟურნალისტი: რუსეთი პატივს სცემს ამ ინტერესს?

შალვა პაპუაშვილი: რუსეთის მხრიდან ქართველი ხალხის მიმართ ეროვნული ინტერესების პატივისცემა გულისხმობს ოკუპაციის დასრულებას.

ჟურნალისტი: და ოკუპაცია დასრულებულია?

შალვა პაპუაშვილი: შესაბამისად, არ ვსაუბრობთ. თქვენ შეიძლება ვერ ატყობთ, მაგრამ დიპლომატიური ურთიერთობებიც არ გვაქვს რუსეთის ფედერაციასთან. არის ერთადერთი ჟენევის ფორმატი, ჰუმანიტარული მიზნებიდან გამომდინარე გვქონდეს კონტაქტი რუსეთის ფედერაციის წარმომადგენლებთან, ვინაიდან მათ აქვთ ეფექტური კონტროლი ოკუპირებულ ტერიტორიებზე. ჩვენ გვითქვამს არა ერთხელ წინაპირობა რა არის ურთიერთობის გადატვირთვისა საქართველოსა და რუსეთს შორის ეს არის საქართველოს დეოკუპაცია. ", — თქვა პაპუაშვილმა.

კითხვაზე, რა აზრის იყო პაპუაშვილი ირაკლი კობახიძის და პუტინის საერთო ფოტოზე, მან უპასუხა — "თქვენ პრობლემას ვერ ხედავთ, რომ ერთ პლანეტაზე ცხოვრობთ თქვენ და რუსეთის პრეზიდენტი?".

ჟურნალისტის კითხვაზე — შეიძლება თუ არა პუტინთან მშვიდობაზე საუბარი, პაპუაშვილმა განაცხადა, რომ "ზუსტად ამიტომ არის მნიშვნელოვანი, რუსეთის პრეზიდენტიც იქ იყოს, როდესაც ჩვენ ვისაუბრებთ მშვიდობის მნიშვნელობაზე".

"ზუსტად ამიტომ არის მნიშვნელოვანი, რუსეთის პრეზიდენტიც იქ იყოს, როდესაც ჩვენ ვისაუბრებთ მშვიდობის მნიშვნელობაზე, სუვერენიტეტის, ტერიტორიული მთლიანობის და საერთაშორისო სამართლის მნიშვნელობაზე.

...ჩვენი მთავარი მიზანი სწორედ ის არის, რომ რუსეთმა ხელი აიღო საქართველოს ტერიტორიების ოკუპაციაზე. რუსეთი უნდა დარწმუნდეს, რომ საქართველოს ტერიტორიული მთლიანობის აღიარების გარეშე ის ურთიერთობა, რომელიც რეგიონში მას შეიძლება ჰქონდეს, ვერ ექნება ჩვენთან. საქართველოს მკაფიოდ აქვს ნათქვამი, რომ მთავარი წინაპირობა გახლავთ ჩვენი ქვეყნის დეოკუპაცია", — თქვა პაპუაშვილმა.

მისივე თქმით, ირაკლი კობახიძესა და ვლადიმერ პუტინს შორის არანაირი შეხვედრა გათვალისწინებული არ არის.

"რა შიშები, რა რისკები გაქვთ. ჩვენ ვმოქმედებთ საქართველოს ეროვნული ინტერესებიდან გამომდინარე. რაც ჩვენს ეროვნულ ინტერესებს ემსახურება, იმას გავაკეთებთ. არანაირი შეხვედრა დაგეგმილი არ არის", — განუცხადა პაპუაშვილმა ჟურნალისტებს.

შეგახსენებთ, ოცნების პრემიერი ირაკლი კობახიძე და ოცნების საგარეო საქმეთა მინისტრი მაკა ბოჭორიშვილი თურქმენეთში ნეიტრალიტეტის 30 წლის იუბილესა და საერთაშორისო ნეიტრალიტეტის დღის აღსანიშნავ ღონისძიებაზე დასასწრებად ჩავიდა, სადაც საერთაშორისო ფორუმს დაესწრება. აშხაბადში იმყოფება რუსეთის პრეზიდენტი ვლადიმერ პუტინი, თურქეთის პრეზიდენტი რეჯეფ თაიფ ერდოღანი, ირანის, ყაზახეთის და სხვა ქვეყნების ლიდერები.