ოცნების პარლამენტის თავმჯდომარემ, შალვა პაპუაშვილმა ბრიფინგზე გერმანიის ელჩის მიერ სამთავრობო მედიების პროპაგანდის შემცველად მოხსენიებასთან დაკავშირებით ისაუბრა და აღნიშნა, რომ "პრეტენზია თუკი აქვს ვინმეს, რომ არის დემოკრატიული სამყაროს წარმომადგენელი კრიტიკული კითხვები უნდა მოისმინოს და მშვიდად უპასუხოს."

მისივე თქმით, ქართული დემოკრატიის სტანდარტი დღეს გაცილებით მაღალია, ვიდრე ზოგიერთი ევროპული დემოკრატიის.

"პრეტენზია თუკი აქვს ვინმეს, რომ არის დემოკრატიული სამყაროს წარმომადგენელი კრიტიკული კითხვები უნდა მოისმინოს და მშვიდად უპასუხოს. პროპაგანდისტობის იარლიყის მიწებებით აჩვენებს უბრალოდ, რომ ეს მცდელობა არის გაექცეს კითხვას და აჩვენებს, რომ სტანდარტი სხვადასხვა არის და ამას ვამბობთ ჩვენ. ქართული დემოკრატიის სტანდარტი დღეს გაცილებით მაღალი არის ვიდრე ზოგიერთი ევროპული დემოკრატიისა. თქვენ ხედავთ, რომ პრემიერმინისტრი, პრეზიდენტი, მეც, როგორც პარლამენტის თავმჯდომარე, პარლამენტის უმრავლესობის ხელმძღვანელი, სხვა წამყვანი თანამდებობის პირები საათობით ყოველ კვირა დროს ვატარებთ ჟურნალისტებთან და არ გავურბივართ არც ერთ კითხვას. ერთხელ მე დავთვალე კიდევაც თუ კვირაში რამდენი საათი უწევს ჯამურად ცალკე პრემიერმინისტრს, ცალკე პარლამენტის თავმჯდომარეს, ცალკე უმრავლესობის ლიდერს... არ არსებობს არც ერთი ქვეყანა, მე მგონი ერთადერთი დონალდ ტრამპი თუ იქნება ამ მხრივ მსგავსი სტატისტიკის მქონე. სხვა შეხედეთ ნებისმიერ ლიდერს — ევროკავშირის ნებისმიერი ქვეყნის პრეზიდენტებს, პრემიერმინისტრებს პარლამენტის თავმჯდომარეებს — ვინ ატარებს ამდენ დროს, ფაქტობრივად, Hard Talk-ის ფორმატში, როდესაც ნებისმიერი კითხვა შეიძლება დაისვას ნებისმიერ საკითხზე და ყველა კითხვას ვცემთ პასუხს", — თქვა პაპუაშვილმა.

ოცნების პარლამენტის თავმჯდომარემ ასევე განაცხადა, რომ ქართული დემოკრატიის სტანდარტთან ზოგიერთი ელჩის სტანდარტი"ახლოს ვერ მიდის" და აღნიშნა, რომ ფიშერის "ფაილი" მათთვის დახურულია.

"ასე რომ, ეს არის ქართული დემოკრატიის სტანდარტი, რომელთანაც, როგორც ჩანს, ახლოს ვერ მოდის ზოგიერთი ელჩის სტანდარტი. რაც შეეხება ბატონ ფიშერს, კიდევ ერთხელ ვიტყვი — მისი ფაილი ჩვენთვის დახურულია", — აღნიშნა პაპუაშვილმა.

ცნობისთვის, გერმანიის ელჩმა სამთავრობო მედიების კითხვაზე, დაუძახებდა თუ არა ის აშშ-ის პრეზიდენტ დონალდ ტრამპს, რომელიც ევროკავშირს აკრიტიკებს, არადემოკრატიულს და პრორუსს, როგორც ამას საქართველოს მთავრობის შემთხვევაში აკეთებდა, ფიშერმა უპასუხა, რომ ეს კითხვა პროპაგანდას შეიცავდა და არ უპასუხებდა.