ქართული ინდი-როკ ჯგუფი Bedford Falls მსმენელს ახალი მუსიკით უბრუნდება. ბენდმა გულშემატკივრებს სასიამოვნო სიურპრიზი გაუკეთა და სულ ახლახან სიმღერა, სახელად, Ambrosia, გამოუშვა.

სინგლის მოსმენა შესაძლებელია როგორც იუთუბზე, ასევე შემდეგ მუსიკალურ პლატფორმებზე: Spotify, Apple Music და Deezer.

Ambrosia ბენდის ახალი ალბომის — LazyBone-ის ნაწილია. მასში შემავალი სიმღერები ნაწილ-ნაწილ გამოვა და ალბომს სრულად 2026 წელს მოვისმენთ.

ფოტო: qutashvili_/IG

შეგახსენებთ, რომ ჯგუფი, Bedford Falls, 2014 წელს ჩამოყალიბდა და მათმა სადებიუტო ალბომმა — This Is Your House დღის სინათლე 2019 წელს იხილა. ხოლო ბოლო ალბომი miende. ბენდმა მსმენელებს 2023 წელს შესთავაზა.

Bedford Falls-ს გასულ წელს კონცერტები ევროპულ ქალაქებშიც ჰქონდა. Calypso-ს ტურნემ სტარტი 2024 წლის 28 ივნისს Inne Brzmienia-ს ფესტივალზე აიღო, ხოლო კონცერტები 21 ივლისს ვენაში დასრულდა.

ამასთანავე, სულ ახლახან 6 და 7 დეკემბერს Bedford Falls-ისა და თბილისის ახალგაზრდული სიმფონიური ორკესტრის პირველი ერთობლივი კონცერტი გაიმართა, რომელსაც მირიან ხუხუნაიშვილმა უდირიჟორა.

ფოტო: Bedford Falls/FB

მომავალ ალბომზე, ბენდის ვოკალისტმა, დათო ჯიქიამ, On.ge-სთან ჯერ კიდევ ივნისში ისაუბრა. როგორც მან აღნიშნა, სიმღერები "ტრეკ-ტრეკად" გამოვა.

"გვინდა, ჩვენმა მსმენელმა იცოდეს, რომ წინ კიდევ უამრავი სიმღერა ელით, ზოგი ძველი ჟღერადობის, ზოგიც სრულიად უცხო", — აღნიშნა მან.

სანამ ბენდი ახალ სიმღერებს შემოგვთავაზებს, გულშემატკივრებს ისღა დაგვრჩენია ხელახლა მოვუსმინოთ ძველ ალბომებს და მოთმინებით დაველოდოთ ახალ სინგლებს.