პარლამენტთან ნეტგაზეთისა და ბათუმელების დამფუძნებლის, მზია ამაღლობლის მხარდამჭერი საპროტესტო აქცია გაიმართა. აქციის მონაწილეებმა, მზია ამაღლობლის კოლეგებმა და მეგობრებმა, მიმართეს უკანონოდ დაკავებულ მედიამენეჯერს და სთხოვეს, რომ შიმშილობა, რომელიც უკვე მე-11 დღეა გრძელდება, შეწყვიტოს.

"მზია, ჩვენ, შენი მეგობრები და კოლეგები პატივისცემით ვუყურებთ შენს ურყევ ნებას და ბრძოლას სამართლიანობისთვის. შენი ხმა ჩვენი და ჩვენი ქვეყნის თავისუფლებისთვის ფასდაუდებელია. გვჯერა, ბევრი მნიშვნელოვანი საქმე ერთად გასაკეთებელი წინ გვაქვს.
მე-11 დღეა შიმშილობ. გთხოვთ, შეაჩერო პროტესტის ეს უკიდურესი ფორმა.

შენ ჩვენთვის და საზოგადოებისთვის ძალიან მნიშვნელოვანი ხარ, როგორც პროფესიონალი და როგორც ადამიანი. შენი ჯანმრთელობა და სიცოცხლე სასწორზე არ უნდა დადო. ერთად უნდა გავაგრძელოთ ბრძოლა, რომელსაც თითოეულ ჩვენგანზე, ჩვენს პროფესიაზე, ჩვენი ქვეყნის მოქალაქეებზე ამხელა გავლენა აქვს.

ყველანი შენს გვერდით ვართ. შენი მაგალითით გამხნევებულები და ძალმოცემულები. გთხოვ, იფიქრო საკუთარ ჯანმრთელობაზე, სიცოცხლეზე და მის მნიშვნელობაზე ჩვენთვის. თავისუფლება ჩვენ შენთან ერთად გვჭირდება.

დიდი სიყვარულითა და პატივისცემით,

შენი მეგობრები, კოლეგები და გულშემატკივრები", — განაცხადეს აქციის მონაწილეებმა.

მზია ამაღლობლის შესახებ ისაუბრა ბათუმელების რედაქტორმა ეთერ თურაძემაც — მისი თქმით, ამაღლობლის დაკავება საჩვენებელი აქტია და ქართული ოცნება ამით სიგნალს უგზავნის ყველას, ვინც მის წინააღმდეგ წასვლას გაბედავს.

"მათთვის ["ქართული ოცნებისთვის"] მზია ამაღლობელი არის ფიგურა, რომელიც ძალიან ბევრი სხვა ადამიანისთვის შეტყობინების მატარებელი იქნება — თუ დააკავებთ მზია ამაღლობელს, რომელიც ყოველთვის ნეიტრალური, ეთიკური და დაბალანსებული მედიის წარმომადგენელი, თუ დააკავებთ ქვეყანაში ამ ტიპის მედიის შემქმნელს, ესე იგი, ყველას დააკავებ — ყველა შეიძლება დააკავო, ყველას შეიძლება სცემო, ყველას შეიძლება ანგარიში გაუსწორო", — განაცხადა ეთერ თურაძემ

შეგახსენებთ, რომ მზია ამაღლობელი პოლიციამ 11 იანვარს ორჯერ დააკავა. პირველად საპროტესტო შინაარსის პლაკატის გაკვრის გამო, მეორედ კი ბათუმის პოლიციის უფროს ირაკლი დგებუაძისთვის სილის გაწვნისთვის პოლიციელზე თავდასხმის ბრალდებით, რაც 4-დან 7 წლამდე პატიმრობას ითვალისწინებს.

14 იანვარს ბათუმის საქალაქო სასამართლომ მზია ამაღლობელს აღკვეთის ღონისძიების სახით პატიმრობა შეუფარდა. გადაწყვეტილება მოსამართლე ნინო სახელაშვილმა გამოაცხადა. მან დააკმაყოფილა პროკურატურის შუამდგომლობა აღკვეთის ღონისძიების სახით პატიმრობის გამოყენებაზე. დაცვის მხარე მზად იყო, გირაოს სახით უზრუნველეყო 100 000 ლარის ღირებულების უძრავი ქონების მობილიზება.

მზია ამაღლობელის გამოკითხვას საქართველოს ახალგაზრდა იურისტთა ასოციაციის ხელმძღვანელი ნონა ქურდოვანიძე დაესწრო. მისი თქმით, პოლიციის განყოფილებაში ადგილი ჰქონდა მზია ამაღლობელზე არაადამიანურ მოპყრობას.