დეკემბრიდან ცალსახად იგრძნობა, რომ აჭარაში აგრესიული ფონია, დაწყებულია რეპრესიები მოქალაქეებისა და თავისუფალი მედიის წინააღმდეგ, — ამის შესახებ NEWS.ON.ge-სთან საიას აჭარის ფილიალის ხელმძღვანელმა, თამარ წულუკიძემ განაცხადა. მისი თქმით, 11-12 იანვარს, 24 საათში, ბათუმში 20 ადამიანი დააკავეს, მათ შორის ბათუმელები და ნეტგაზეთის დამფუძნებელი და დირექტორი, მზია ამაღლობელი.

"ბათუმელები და ნეტგაზეთი არის ძალიან აქტიური ონლაინ მედიაა, რომელიც ბათუმში მიმდინარე ყველა მოვლენას აშუქებს და, ბუნებრივია, ეს ზოგიერთ ადამიანს, სახელმწიფო უწყებებს უქმნით დისკომფორტს. მზია ამაღლობელის დაკავება და მისთვის აღკვეთის ღონისძიების სახით პატიმრობის შეფარდება მიზნად ისახავს იმას, რომ მოხდეს თავისუფალი მედიის შევიწროება, დაშინება და ამ გზით საქმიანობის ხელშეშლა. ჩვენი მოთხოვნაა, რომ მოხდეს კვალიფიკაციის გადასინჯვა და ის პირები, რომელიც ჩართული არიან ამ საქმეში, ჩამოშორებული იქნან იმ თანამდებობრივ პოზიციას, რაც აქამდე უკავიათ. დეკემბრიდან ცალსახად იგრძნობა, რომ არის აგრესიული ფონი, დაწყებულია რეპრესიები მოქალაქეებისა და თავისუფალი მედიის წინააღმდეგ", — ამბობს თამარ წულუკიძე.

რაც შეეხება ბათუმელების ოპერატორ, გურამ მურვანიძის დაკავებას, საიას აჭარის ფილიალის ხელმძღვანელი ამბობს, რომ უდავია, თავისუფალი მედიის საქმიანობის ხელშეშლა ხდება. მისი თქმით, ამ საქმეში განსაკუთრებით მნიშვნელოვანი არის ის, რომ ის მას შემდეგ დააკავეს, რაც გაიგეს, რომ "ბათუმელების" ოპერატორი იყო.