პოლიტიკური ნიშნით სამსახურიდან გათავისუფლებაზე კიდევ 3 საჯარო მოხელე საუბრობს. კობა (მორის) ბარამია Facebook პოსტში წერს, რომ "საჯარო სამსახურის შესახებ" საქართველოს კანონში განხორციელებული ცვლილებების ეფექტი მისი გამოქვეყნებიდან მე-2 დღეს საკუთარ თავზე გამოცადა — ის არასაპატიმრო სასჯელთა აღსრულებისა და პრობაციის ეროვნულ სააგენტოში 2014 წლიდან მუშაობდა და ამ ეტაპზე განრიდებისა და მედიაციის დეპარტამენტის უფროსის პოზიციას იკავებდა.

ბარამიას პოსტში ვკითხულობთ იმასაც, რომ სამსახურიდან კიდევ ორი დეპარტამენტის ხელმძღვანელები — არასრულწლოვანთა რეფერირების ცენტრის უფროსი ნათია ალიაშვილი და მსჯავრდებულთა და ყოფილ პატიმართა რეაბილიტაციისა და რესოციალიზაციის დეპარტამენტის უფროსი ნინო ტყეშელაშვილი გაათავისუფლეს.

"მაქვს პატივი გაცნობოთ, რომ 31 დეკემბერს, 20:37 საათზე, თურმე, კანცელარიის პროგრამაში დამეწერა თანდართული შეტყობინება.

ეს არის ნამდვილი საახალწლო საჩუქარი, რომელიც გუშინ ვნახე შემთხვევით და მთელი ცხოვრება მემახსოვრება.

დიახ, პირველი თებერვლიდან ვემშვიდობები საქმეს, სამსახურს, რომელსაც ჩემი ცხოვრების 10 წელი მივუძღვენი უმაგრეს პროფესიონალებთან ერთად და ძალიან მიყვარს. 2014 წელს ამ სისტემაში ასისტენტის პოზიციაზე დავსაქმდი და ამ ათი წლის განმავლობაში, ნელ-ნელა, დაწინაურებებით 2020 წელს დავინიშნე დეპარტამენტის უფროსად. ახლა კი „საჯარო სამსახურის შესახებ“ საქართველოს კანონში განხორციელებული ცვლილებების ეფექტი მისი გამოქვეყნებიდან მე-2 დღეს გამოვცადე საკუთარ თავზე.

უნდა მოგიყვეთ რა მაგარ საქმეს ვაკეთებდით. ძალიან, ძალიან ბევრ ადამიანს, ბავშვს ვეხმარებოდით და ვამაყობ რომ ბევრი ბავშვის ცხოვრება სწორი მიმართულებით შევცვალეთ (ზრდასრულებისაც). მეტიც, მე იმ დეპარტამენტს ვხელმძღვანელობდი, რომელმაც მკვლელობის საქმეზე ჩაატარა მედიაცია, ერთმანეთს შეახვედრა გარდაცვლილის ოჯახის წევრები და მსჯავრდებული, შედეგად კი შურისძიების რისკები ისე დაწია, წლებია არანაირ ინციდენტს ადგილი არ ჰქონია.

გული მისკდება იმის გაცნობიერებით, რომ ჯამში სამი დეპარტამენტის საქმეზე თავგადადებულ უფროსს გვიშვებენ სამსახურიდან", — ვკითხულობთ მორის ბარამიას პოსტში.