ლას-ვეგასში, Trump International Hotel-ის შესასვლელთან Tesla-ს მანქანა Cybertruck აფეთქდა, ხოლო მასში მჯდომი ერთი ადამიანი ადგილზე გარდაიცვალა. ამასთან, აფეთქების ადგილთან ახლოს მყოფი რამდენიმე პირი დაშავდა.

შემთხვევა დღეს, 2 იანვარს მოხდა. NBC News სამი მაღალი რანგის სამართალდამცავის ინფორმაციით წერს, რომ აფეთქება განიხილება, როგორც შესაძლო ტერორისტული თავდასხმა.

მოგვიანებით, FBI-ის სპეციალურმა აგენტმა, ჯერემი შვარცმა ჟურნალისტებთან განაცხადა, რომ ჯერჯერობით ცნობილი არ არის, იყო თუ არა აფეთქება ტერორისტული აქტი — წერს Reuters.

ამასთან, შვარცმა აღნიშნა, რომ FBI-მ დაადგინა მსხვერპლის ვინაობა თუმცა, მისი თქმით, ამ ეტაპზე ნაადრევია მძღოლის იდენტობის საჯაროდ გამჟღავნება. FBI-ს ინფორმაციით, მძღოლმა მანქანა კოლორადოში იქირავა.

მოგვიანებით, აღნიშნულ აფეთქებას ილონ მასკიც გამოეხმაურა, რომელმაც აღნიშნა, რომ აფეთქება მანქანის გაუმართაობის ბრალი არ ყოფილა.

"ჩვენ ახლა დავადგინეთ, რომ აფეთქება გამოწვეული იყო ნაქირავები Cybertruck-ის სატვირთო ნაწილში მოთავსებული ძალიან დიდი ფეიერვერკით ან ბომბით და თვითონ მანქანასთან კავშირში არ არის. აფეთქების დროს მანქანის ყველა ტელემეტრიული მონაცემი ნორმაში იყო", — წერს მასკი თავის X-ზე.