საქართველოს მოქალაქეები, სამოქალაქო ორგანიზაციების, საქართველოს პოლიტიკური პარტიების, საზოგადოების სხვადასხვა ჯგუფის წარმომადგენლები საქართველოს საზოგადოებრივ ასამბლეას აფუძნებენ, მათივე განცხადებით ასამბლეა იქნება საზოგადოებრივ-პოლიტიკური თანამშრომლობის პლატფორმა.

"სახეზეა ღრმა პოლიტიკური კრიზისი — ყოველდღიურად ქუჩაში გამოსულ ასობით ათას მშვიდობიან მომიტინგეს ზღვარგადასული ძალადობრივი მეთოდებით უსწორდება არსებული რეჟიმი. რთული გეოპოლიტიკური გამოწვევების ფონზე, მიმდინარე კრიზისი საფრთხეს უქმნის არა მხოლოდ ქვეყნის დემოკრატიულ, სტაბილურ განვითარებას და მის ევროინტეგრაციის პროცესს, არამედ მის სუვერენიტეტსაც.
არსებული პოლიტიკური სისტემა, ტრანსფორმაციის გარეშე, ვერ ახერხებს მოცემული კრიზისის გადაჭრას და პროცესების დემოკრატიულ ჩარჩოში დაბრუნებას და წარმოქმნის მხოლოდ ნეგატიური განვითარების სცენარებს". — ვკითხულობთ მემორანდუმში.

ხელმომწერების თქმით, მათი პლატფორმა დაეყრდნობა 1917 წლის საქართველოს ეროვნული ყრილობის მემკვიდრეობას — გააერთიანებს საზოგადოებას, განსხვავებული პარტიებისა და საზოგადოებრივი ჯგუფების წარმომადგენლებს.
საქართველოს საზოგადოებრივი ასამბლეის დაფუძნების მიზნით იქმნება სამუშაო ჯგუფი, რომელიც ინიციატორების თქმით ღიაა ყველა დაინტერესებული პირისა და ინტერეს-ჯგუფისთვის.

ასამბლეის პირველი ამოცანებია ის ორი მოთხოვნა რაც მიმდინარე პროტესტს აქვს — უკანონოდ დაპატიმრებულების გამოშვება და ახალი არჩევნების დანიშვნა.
კიზირიას თქმით ეს არ არის პოლიტიკური მოძრაობა, ესაა განსხვავებული ჯგუფებისთვის თანამშრომლობის პლატფორმა, მას რეჟიმზე გავლენა ექნება იმდენად, რამდენადაც პოლიტიკოსებს ეცოდინებათ, რომ ასამბლეაში არიან სხვადასხვა ინტერესთა ჯგუფების წარმომადგენლები, რომელთაც შეუძლიათ, მაგალითად, ათობით ათასი ადამიანის გამოყვანა. მისი ინფორმაციით, ასამბლეა იანვარში დაფუძნება.