"მაუწყებლის" ცნობით, აგარის შაქრის მწარმოებელი ქარხნის თანამშრომლები დაპირებულ მე-13 ხელფასს ითხოვენ, დირექტორთა საბჭო კი საპასუხოდ თანამშრომლებს 2 ტომარა შაქარს სთავაზობს და 31 დეკემბრიდან კონსერვაციის რეჟიმში გადასვლას აპირებს.

"31 დეკემბერს დასრულდება მათი ხელშეკრულებებიც და ქარხნის მუშაობაც," — ამბობს bm.ge-სთან ნიკოლოზ ნათბილაძე, აგარის დირექტორთა საბჭოს წევრი.

მან ასევე დასძინა, რომ თანამშრომლები არასწორ ინფორმაციას ავრცელებენ და საბჭოს მხრიდან მე-13 ხელფასის დაპირება არ ყოფილა.


აგარის ქარხანაში 400-მდე ადამიანია დასაქმებული. ის ერთადერთი საწარმოა დაბაში, რაც იმას ნიშნავს, რომ აგარის მაცხოვრებლები ეკონომიკურად სრულად არიან დამოკიდებული ამ ქარხნის მუშაობაზე. წელიწადში საშუალოდ 3 თვის განმავლობაში ქარხანა მუშაობას დროებით წყვეტს, სწორედ ამ პერიოდისთვის მშრომელებისთვის უმნიშვნელოვანესია წინასაახალწლოდ მე-13 ხელფასით სარგებლობა, რომ ქარხნის ამუშავებამდე თავის გატანა შეძლონ.
მშრომელები აცხადებენ, რომ ბოლო თვეში, სამუშაო ძალის დეფიციტის გამო, გაორმაგებული ძალებით მუშაობდნენ, თუმცა, დირექტორთა საბჭოს გადაწყვეტილებით, ისინი მე-13 ხელფასს ვერ მიიღებენ, ბაზარზე კონკურენციის და "ცუდი ფინანსური წლის" გამო.

“საახალწლოდ ადრე 1 ტომარა მათ ყოველთვის ჰქონდათ საჩუქრად, წელს ისე გავაკეთეთ რომ 2 ტომარას ვჩუქნით თითო თანამშრომელს. შარშან რომ მიიღეს მე-13 ხელფასი, ეტყობა წელსაც ჰქონდათ ამის მოლოდინი. შედეგი არ არის შესაბამისი, როგორიც შარშან იყო და შესაბამისად ვერანაირად ამ გადაწყვეტილებას ვერ შევცვლით,“ — განაცხადა ნიკოლოზ ნათბილაძემ bm.ge-სთან.


აგარასთან მშრომელების პროტესტი გრძელდება. ისინი სახელმწიფოს პროცესში ჩართვისკენ მოუწოდებენ.