ლაშა ბექაურმა, რომელსაც ბოლო პერიოდში ქართული ოცნების არალეგიტიმური მთავრობის გულშემატკივრად უფრო ვიცნობთ, ვიდრე ოლიმპიურ სპორტსმენად, სოციალურ ქსელში მორიგი სასაცილოა-სატირალი-რომ-არ-იყოს ჟანრის ვიდეო გაავრცელა.

როგორც ჩანს, სპორტსმენმა საკუთარი ეგოს დასაკმაყოფილებლად ახალი კრეატიული გზა იპოვა და ავტობუსის ზოლში (რომელში მოძრაობაც მხოლოდ გარკვეული პრივილეგიების მქონე ადამიანებს შეუძლიათ) მანქანის ტარებისას ლომის ბოკვერს გვაჩვენებს. ალბათ, ლაშა ბექაურს საქართველოს კანონები გარეული ცხოველის ყოლისა და სათანადო პირობებში გაზრდის შესახებ არ ეხება, ამიტომ კიდევ 3 გარეულ ცხოველს ვურჩევთ, რომლებზეც უნდა ღელავდეს:


1. ბიძინა ივანიშვილის ზებრა

ფოტო: ტაბულა


ბოლოს როდის გაიგეთ ახალი ამბავი ბიძინა ივანიშვილის ზებრას კეთილდღეობის შესახებ? ჩვენ, პირადად, დიდი ხანია აღარაფერი გვსმენია ოლიგარქის თვითნაშენ საფარზე. ვფიქრობთ, ამ საკითხს ლაშა ბექაური სიღრმისეულად უნდა ჩაეძიოს და ლომის შემდეგ, ზებრაც თავის პატრონაჟში აიყვანოს.


2. ჯიხვი

ფოტო: National Geographic


ვინაიდან ლაშა ბექაური ველური ცხოველების ყოლასთან დაკავშირებულ სისხლის სამართლის კანონებს არაფრად აგდებს, არ გაგვიკვირდება, წითელ ნუსხაში შეტანილი ცხოველების დასაკუთრება და თავისი გართობისთვის გამოყენებაც რომ განიზრახოს. იქნებ, ბექაური მალე ჯიხვებზეც აღელდეს — ცხოველზე, რომელიც სწორედ მის მშობლიურ მთებში ბინადრობს, და პორშეთი მისი გასეირნებაც განიზრახოს.


3. ციმბირული ვეფხვი

ფოტო: Getty Images


ბექაური აშკარად ისეთ ექსცენტრულ ფიგურად ჩამოყალიბებას უმიზნებს, როგორიც მაიკ ტაისონია. ვფიქრობთ, ტაისონის მსგავსად, ვეფხვი ბექაურმაც უნდა შეიძინოს. თანაც, მისი ერთი აღელვება საკმარისი იქნება იმისთვის, რომ მისმა კადიროველმა მეგობრებმა მაშინვე უშოვონ ოლიმპიელს ციმბირული ვეფხვი.

ლაშა ბექაური ხამზატ ჩიმაევთან, კადიროვთან დაახლოებულ MMA-ს მებრძოლთან ერთად

ფოტო: ლაშა ბექაური/ Instagram