ადამიანის უფლებების სწავლებისა და მონიტორინგის ცენტრი (EMC) 24 აგვისტოს რკინიგზელთა საპროტესტო აქციის მონაწილეების დაკავებას გამოეხმაურა.

EMC-ის მიერ გავრცელებულ განცხადებაში ნათქვამია, რომ ორგანიზაცია პროკურატურას მოუწოდებს დაიწყოს გამოძიება პოლიციელების მხრიდან უფლებამოსილების სავარაუდო გადამეტების ფაქტზე სისხლის სამართლის კოდექსის 333-ე მუხლით:

"მოშიმშილეების მხრიდან ადმინისტრაციის შენობაში შესვლის ინიციატივას პოლიციის ინტენსიური წინააღმდეგობა მოჰყვა, რის დროსაც აქციის 3 მონაწილე დააკავეს. დაკავებული პირები პოლიციას რამდენიმე საათის განმავლობაში რკინიგზის ადმინისტრაციის შენობაში ჰყავდა მოთავსებული".

ორგანიზაციის თქმით, დაკავებული პირების დასაცავად აქციის მონაწილეებმა პოლიციას "მშვიდობიანი წინააღმდეგობა გაუწიეს", პოლიციის მანქანებს წინ გადაუდგნენ, რასაც პოლიციის "აგრესიული" საპასუხო რეაგირება მოჰყვა:

"პოლიციამ ყოველგვარი გაფრთხილებისა და გონივრული დროის მიცემის გარეშე, დაიწყო გზის სავალი ნაწილის გათავისუფლება და შეკრების მონაწილეების გზიდან გადაყვანა უხეში და არაპროპორციული საპოლიციო ძალის გამოყენებით".

EMC-ის თქმით, დაკავებულების გაყვანის შემდეგ, მიმდებარე ქუჩაზე პოლიციამ ფიზიკური შეურაცხყოფისა და უხეში საპოლიციო ძალის გამოყენებით შეკრების მონაწილეების დაკავება დაიწყო:

"პოლიციამ დამატებით 7 აქტივისტი დააკავა. ფიზიკური დაპირისპირების დროს დაშავდა აქციის ორი მონაწილე, რომლებიც სასწრაფო სამედიცინო დახმარებამ საავადმყოფოში გადაიყვანა. დაპირისპირების დროს დაშავდნენ მედიის წარმომადგენლებიც. გავრცელებული ინფორმაციით, დაკავებულების ნაწილს სხეულზე ფიზიკური დაზიანებები აღენიშნებათ".

EMC მიიჩნევს, რომ რკინიგზელების ათდღიანი პროტესტის განმავლობაში, პოლიციის ქმედებები მიმართული იყო დასაქმებულთა წინააღმდეგობის დასუსტებისკენ, რაც დამსაქმებელი საწარმოს ინტერესების მიმართ ლოიალობაზე მიუთითებს:

"შეკრებებისა და მანიფესტაციების მიმდინარეობისას პოლიციის ქცევის ანალიზი აჩვენებს, რომ ამ დრომდე პრობლემურია პოლიციის მიერ მოქალაქეებთან სათანადო კომუნიკაციისა და შეკრების თავისუფლების მაღალი სტანდარტით დაცვის საკითხი".

24 აგვისტოს საღამოს გამართულ აქციაზე, მოშიმშილეებმა გადაწყვიტეს შენობაში შესვლა და შიმშილობის ფოიეში გაგრძელება. ამის მიზეზი გახდა სასამართლოს გადაწყვეტილება, რომლის მიხედვითაც, მოშიმშილეებს რკინიგზის ცენტრალური ოფისის მიმდებარედ არ მიეცათ კარვების გაშლის ნებართვა.

საპროტესტო აქციის მონაწილეები თავდაპირველად სამუშაო პირობების გაუმჯობესებას მოითხოვდნენ. მოგვიანებით, მათ მოთხოვნებს საქართველოს რკინიგზის პრესსამსახურის უფროსის დაჩი ცაგურიასა და რკინიგზის ინფრასტრუქტურის დირექტორის ვასილ ხორავას გათავისუფლების მოთხოვნა დაემატა.