აშშ-ის ახლად არჩეული პრეზიდენტის, დონალდ ტრამპის თქმით, მან მექსიკის პრეზიდენტთან სატელეფონო საუბარში, მიგრაციის საკითხი განიხილა.

"მექსიკის ახალ პრეზიდენტთან, კლაუდია შეინბაუმთან შესანიშნავი საუბარი მქონდა. ის მექსიკის გავლით ამერიკის შეერთებულ შტატებში მიგრაციის შეჩერებას დათანხმდა, ფაქტობრივად ჩვენი სამხრეთ საზღვრის დაკეტვას", — წერს დონალდ ტრამპი საკუთარ Truth Social-ის პლატფორმაზე.

მექსიკის პრეზიდენტის, კლაუდია შეინბაუმის ცნობით, დონალდ ტრამპს მიგრაციასთან დაკავშირებით მექსიკის ყოვლისმომცველი სტრატეგია აუხსნა, რომელიც ადამიანის უფლებების დაცვას ითვალისწინებს.

"კიდევ ერთხელ ვიმეორებთ, რომ მექსიკის პოზიციას არა საზღვრების ჩაკეტვა, არამედ მთავრობებსა და ხალხებს შორის ხიდების აშენება წარმოადგენს", — წერს მექსიკის პრეზიდენტი X-ზე.

ტრამპმა მანამდე განაცხადა, რომ მექსიკიდან იმპორტირებულ ყველა პროდუქტზე დააწესებს 25%-იან ტარიფს, რომელიც ძალაში იქამდე დარჩება, სანამ არ შეზღუდავენ აშშ-ში ნარკოტიკებისა და მიგრანტების უკანონოდ შესვლას.