კოალიცია ძლიერმა საქართველომ ცესკოს გიორგი სიორიძის ცენტრალური საარჩევნო კომისიის წევრად ხელახლა დანიშვნასთან დაკავშირებით მიმართა.

ოპოზიციური პარტიის განცხადება გიორგი კალანდარიშვილმა უკვე დააკმაყოფილა. როგორც News.on.ge — თან საუბარში გიორგი სიორიძემ განაცხადა, იმის მიუხედავად, რომ ცესკოს რეპუტაცია უკიდურესად შელახულია, საჭიროა ოპოზიციას ცენტრალურ საარჩევნო კომისიაში ჰყავდეს ადამიანი, ვინც ამხელს ამ უწყებას.

"ამ უწყების რეპუტაცია დიდი ხანია შელახულია, თუმცა ეს არ ნიშნავს, რომ არ გამოვიყენოთ ის ბერკეტები, რაც ჩვენს ხელთაა და არ ვამხილოთ სისტემა. უნდა ვიბრძოლოთ, რომ ცესკოს ძვირად დაუჯდეს ის დანაშაულები, რასაც ისტორიის წინაშე სჩადის. საარჩევნო კომისიას მართავს კლანი და ეს კლანი არის ქართული ოცნების მიერ მართული. მართალია მე არ ვფლობ არანაირ ბერკეტს მათ საქმიანობაზე გავლენა მოვახდინო, თუმცა ეს არ ნიშნავს, რომ ამ უწყების მხილება არ შემიძლია. ჩემი საქმიანობა ცესკოში ისეთივე იქნება, რაც იყო ბოლო სამი წლის განმავლობაში", — აცხადებს გიორგი სიორიძე.

ცენტრალური საარჩევნო კომისიის სპიკერის, ნათია იოსელიანის განცხადებით, საქართველოს საპარლამენტო არჩევნების შემდეგ, ხუთ პოლიტიკურ სუბიექტს აქვს უფლება საარჩევნო ადმინისტრაციაში კომისიის წევრი დანიშნოს - მანამ, ვიდრე პარლამენტს უფლებამოსილების ვადა არ გაუვა.

იოსელიანის თქმით, ამ დროისთვის ადმინისტრაციაში თავის წარმომადგენელი ორმა პარტიამ, ქართულმა ოცნებამ და ლელომ დანიშნა.

"საქართველოს პარლამენტის შედეგების შესაბამისად, კანონმდებლობის მიხედვით, ხუთ პოლიტიკურ გაერთიანებას წარმოეშვა იმის უფლება, რომ დანიშნოს საარჩევნო ადმინისტრაციაში კომისიის წევრი. ამ დროისთვის, ორმა პოლიტიკურმა გაერთიანებამ - ქართულმა ოცნებამ და ლელომ აღნიშნული უფლებით ისარგებლა და ცენტრალურ საარჩევნო კომისიაში დანიშნა კომისიის წევრები. უფლებამოსილ პარტიას აქვს შესაძლებლობა, რომ კომისიის წევრები დანიშნოს ცენტრალურ საარჩევნო კომისიაში საქართველოს პარლამენტის უფლებამოსილების ვადის ამოწურვამდე. ასევე აქვთ იმის უფლება, რომ ნებისმიერ დროს შეცვალონ აღნიშნული კომისიის წევრები", — განაცხადა ნათია იოსელიანმა.