BBC-ის ცნობით, აშშ-ის პრეზიდენტმა, ჯო ბაიდენმა თანხმობა განაცხადა, გადასცეს უკრაინას ქვეითსაწინააღმდეგო ნაღმები.

ანონიმურმა წყარომ განაცხადა, რომ ნაღმები მალე უკრაინაში იქნება და ისინი უკრაინის ტერიტორიაზე იქნება გამოყენებული. 17 ნოემბერს აშშ-მ უკრაინას შორი დისტანციის რაკეტების რუსეთის ტერიტორიის სიღრმეში გამოყენების უფლებაც მისცა.

ქვეითსაწინააღმდეგო ნაღმების აკრძალვის შესახებ კონვენცია საერთაშორისო საზოგადოებამ ჯერ კიდევ 1997 წელს დააინიციირა და ეს ერთ-ერთი უმნიშვნელოვანესი ჰუმანიტარული ინიციატივა იყო.

კონვენცია კრძალავს ამ ტიპის შეიარაღების გამოყენებას, წარმოებას, დასაწყობებასა და გადაცემას. წითელი ჯვრის პოზიცია ქვეითსაწინააღმდეგო ნაღმებთან დაკავშირებით შემდეგია: ისინი ტოვებენ სიკვდილის, დაზიანებისა და ტანჯვის ხანგრძლივ მემკვიდრეობას. ხშირად აუფეთქებელ ნაღმებზე ბავშვები აბიჯებენ და იხოცებიან ან სამუდამოდ სახიჩრდებიან.

კონვენციას 164 ხელმომწერი ჰყავს, რომელთა შორისაც აშშ და რუსეთის ფედერაცია არ არიან, თუმცა უკრაინას ხელმომწერთა სიაში ვხვდებით.

გავრცელებული ცნობების თანახმად, უკრაინა აპირებს გამოიყენოს მხოლოდ ის ნაღმები, რომლებიც აქტიურია გარკვეული დროის განმავლობაში, ხოლო ამ დროის (რამდენიმე საათიდან რამდენიმე კვირამდე) გასვლის შემდეგ უსაფრთხო ხდება.