აზერბაიჯანში პროდემოკრატიული ჯგუფის, NIDA-ს წევრი, ბაქოში ხულიგნობისა და პოლიციისადმი დაუმორჩილებლობის ბრალდებით დააკავეს და 30 დღით პატიმრობა მიუსაჯეს.

30 ოქტომბერს, მეტე თურქსოი ბაქოში, განჯლიკის მეტროსადგურზე დააკავეს. მას პოლიცია ჩანთის გაჩხრეკას სთხოვდა, სწორედ ამან გამოიწვია კამათი.

თურქსოის ბრალი წვრილმან ხულიგნობაში და პოლიციისადმი დაუმორჩილებლობაში წაუყენეს და 30-დღიანი ადმინისტრაციული პატიმრობა შეუფარდეს.

NIDA-ს წევრმა არაზ ალიევმა OC Media-სთან საუბარში განაცხადა, რომ თურქსოი ქალაქ შაკიში ცხოვრობდა და ბაქოში თავის ნათესავებთან სტუმრად იყო ჩამოსული.

"ის ბაქოში ნათესავის სახლში დარჩა. ეს ბანალური ამბავია და ის ტყუილად დააკავეს", — განაცხადა ალიევმა.

ალიევის განცხადებით, თურქსოი მეგობართან ერთად მეტრო განჯლიკისკენ მიდიოდა, რა დროსაც დააკავეს. მისი თქმით, მისი მეგობარი პოლიციის დარწმუნებას ცდილობდა, რომ ჩანთა არ გაეჩხრიკათ და მხოლოდ რენტგენის აპარატით შეემოწმებინათ.

ამის შემდეგ თურქსოიმ პოლიციელებს ბოდიში მოუხადა, თუმცა პოლიციამ ის დაუმორჩილებლობაში დაადანაშაულა და დააკავა.

"თურქსოი მეტროში მდებარე მეტე ნიზამის პოლიციის განყოფილებაში წაიყვანეს, მაგრამ როდესაც მისი ვინაობა და საქმიანობა გაირკვა, მისდამი პოლიციის ქცევა შეიცვალა", — თქვა ალიევმა. " პოლიცია მას არ აძლევდა ადვოკატთან და ოჯახის წევრებთან დაკავშირების უფლებას. მეორე დღეს კი, პატიმრობა შეუფარდეს".

ალიევი მიიჩნევს, რომ თურქსოი მისი პოლიტიკური აქტივობისა და ხელისუფლების კრიტიკის გამო დააკავეს.

"ის სოციალურ მედიაში აკრიტიკებდა ხელისუფლებას და ამიტომაც მოვუწოდებთ მას, [რომ არ გააკრიტიკოს მთავრობა], წინააღმდეგ შემთხვევაში ის შესაძლოა ზეწოლის ქვეშ აღმოჩნდეს. ჩვენ ასევე ველით, რომ მას მოგზაურობას აუკრძალავენ ან შეაჩერებენ ქვეყნის დატოვებას თუ შეეცდება".

NIDA-მ გამოაქვეყნა განცხადება, სადაც ნათქვამია, რომ მათ სჯერათ, რომ თურქსოის დაკავება თავიდან პოლიტიკური მიზნით არ მომხდარა, მაგრამ შემდეგ პოლიტიკური სარჩული დაედო.

"ჩვეულებრივი ინციდენტის გამო, ის პოლიციაში 24 საათის განმავლობაში იმყოფებოდა, შემდეგ კი მაქსიმალური სასჯელი მიუსაჯეს. მისი დაკავების რეალური მიზეზი საჯარო და პოლიტიკური აქტივობა და სოციალურ ქსელებში კრიტიკული პოსტები", — ნათქვამია NIDA-ს განცხადებაში.

ალიევმა OC-Media-სთან საუბარში ასევე აღნიშნა, რომ ის შიშობს და ელოდება, რომ აზერბაიჯანის მხრიდან სამოქალაქო საზოგადოების აქტორების და ორგანიზაციების რეპრესიები კიდევ უფრო გაიზრდება გაეროს COP29 კლიმატის კონფერენციის შემდეგ, რომელიც ბაქოში 11-22 ნოემბერს გაიმართება.

თურქსოი მანამდე ადმინისტრაციული ბრალდებით 2019 წელს, მას შემდეგ დააკავეს, რაც მან ბაქოში ბლოგერის მეჰმან ჰუსეინოვის გათავისუფლების მოთხოვნით გამართულ საპროტესტო აქციაში მიიღო მონაწილეობა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.