თბილისის სააპელაციო სასამართლომ საარჩევნო დარღვევებთან დაკავშირებით არასამთავრობო ორგანიზაციების სარჩელები არ დააკმაყოფილა. სხდომა თბილისის სააპელაციო სასამართლოში თითქმის 24 საათი გრძელდებოდა.

არასამთავრობო ორგანიზაციების სარჩელები საარჩევნო დარღვევებთან დაკავშირებით, არც ქუთაისის სააპელაციო სასამართლომ დააკმაყოფილა.

ასევე, თბილისის სააპელაციო სასამართლომ გააერთიანა საიას 12 საქმე 40-მდე ოლქის წინააღმდეგ და კოალიცია ჩემი ხმის საქმეები. ნონა ქურდოვანიძის თქმით, პროცესის დაწყებისას საქმეების გამიჯვნა მოითხოვეს, რადგან ამ მოცულობის საქმეების ერთ საქმედ გაერთიანება არ იყო გონივრული და სამართლიანი სასამართლოს უფლების დარღვევას გამოიწვევდა, თუმცა მოსამართლე დიმიტრი გვრიტიშვილმა მოთხოვნა არ დააკმაყოფილა და უპასუხა, რომ რადგან სააპელაციო სასამართლო საარჩევნო დავების განმხილველი ბოლო ინსტანციაა, არ იქნებოდა სწორი, ერთგვაროვან მოთხოვნებზე სხვადასხვა მოსამართლეს მიეღო გადაწყვეტილება.

ცნობისთვის, მოსამართლე გვრიტიშვილს არასამთავრობო ორგანიზაციები "მოსამართლეთა კლანის" წევრად მოიხსენიებენ. ის კატეგორიულად ეწინააღმდეგება "ვეტინგს", რომელიც ევროკომისიის რეკომენდაციაა და მოსამართლეთა კეთილსინდისიერების გადამოწმებას გულისხმობს.