მოლდოვის პრემიერმინისტრმა, დორინ რეჩანმა განაცხადა, რომ ქვეყნის საპრეზიდენტო არჩევნების მეორე ტურის წინ მოქალაქეებს ანონიმური ზარების გამოყენებით მოკვლით ემუქრებიან.

"დაშინების ამ აქტებს ერთი მიზანი აქვს: პანიკისა და შიშის შექმნა, რათა ხალხს ქუჩაში გამოსვლის და ხმის მიცემის შეეშინდეს. გარწმუნებთ, რომ სამთავრობო ინსტიტუტები წესრიგსა და მოქალაქეებს დაიცავენ", — განაცხადა რეჩანმა.

მანვე აღნიშნა, რომ არა მხოლოდ რიგით მოქალაქეებს, არამედ სატელეფონო ზარების საშუალებით, მოკვლით ემუქრებიან ჟურნალისტებსა და ცნობილ ადამიანებსაც.

ცნობისთვის, მოლდოვაში საპრეზიდენტო არჩევნების მეორე ტური ჩაინიშნა, რომელიც 3 ნოემბერს გაიმართება. მეორე ტურში ერთმანეთს მოქმედი პრეზიდენტი მაია სანდუ და ყოფილი გენერალი პროკურორი, ალექსანდრე სტოიანოგლო დაუპირისპირდებიან.