26 ოქტომბრის საპარლამენტო არჩევნებში არსებულ დარღვევებზე NEWS.On.ge-სთან მარნეულის ერთ-ერთი საარჩევნო უბნის დამკვირვებელმა ბაკურ ხიჯაკაძემ ისაუბრა.

როგორც ხიჯაკაძე აცხადებს, არჩევნები არ ჩატარებულა კანონმდებლობით გათვალისწინებული ნორმებით, ადგილი ჰქონდა ჩხუბს, დაშინებას და ადგილზე გაურკვეველი ორგანიზაციების წარმომადგენლები იმყოფებოდნენ.

ამასთან, მან დასძინა, რომ უბანზე ატეხილი ჩხუბის შედეგად უბანზე კომისიის დაახლოებით 10 წევრიდან, 3-4 კაცი რჩებოდა, რომელთა მხრიდანაც უბნის გაკონტროლება სათანადოდ ვერ ხერხდებოდა.

"საარჩევნო უბნებზე არჩევნები არა თუ გაყალბდა, შეიძლება ითქვას, რომ საერთოდ არ ჩატარებულა იმ ფორმით, რა ფორმით ჩატარებასაც კანონმდებლობა ითვალისწინებს და უნდა ტარდებოდეს, ანუ აქ საუბარი არ არის უბრალოდ ხარვეზებზე, არამედ მთლიანად ფორმა იყო არასათანადო ამ პროცესისთვის. რაც საარჩევნო უბანზე არაერთი ჩხუბი მოხდა. მათ შორის იყო გაურკვეველი ორგანიზაციებიდან მოსულ წარმომადგენლებსა დამკვირვებლებს შორის, ასევე საარჩევნო უბნის კომისიის წევრებს შორის ჩხუბი, ასევე — კომისიის წევრების მიერ საარჩევნო უბნის მიტოვების ფაქტები, რომლის დროსაც კომისიის 10 წევრიდან 3-4 რჩებოდა ადგილზე, რომლებიც საარჩევნო პროცესს სათანადოდ არ და ვერ უძღვებოდნენ", — ამბობს ხიჯაკაძე.

მარნეულის უბნის დამკვირვებლის თქმით, პასპორტებში ჩაკრული იყო სხვა გაურკვეველი პირის საიდენტიფიკაციო ნომრები, რომელიც სარეგისტრაციოსთან განსხვავებულ მონაცემებს აჩვენებდა.

"ხაზგასასმელია პასპორტების თემაც. პასპორტით მოსულ ამომრჩეველს პასპორტში ჰქონდა ჩამაგრებული რაღაც განსხვავებული საიდენტიფიკაციო ნომერი, რომელიც განსხვავებულ შედეგს იძლეოდა რეგისტრაციასთან და ეს ფაქტი აუცილებლად გადასამოწმებელი და შესასწავლია.

მარნეულის მუნიციპალიტეტის უბნებში აბსოლუტურად ამორფულად ტარდებოდა საარჩევნო პროცესი", — ჰყვება დამკვირვებელი.

ამასთან, მან ხაზგასმით აღნიშნა დამკვირვებელთა და მედიის წარმომადგენელთა უსაფრთხოების დარღვევის პრობლემებზეც.

"უბნებზე მიუკერძოებელ დამკვირვებლებს დაცულობის შეგრძნება არ ჰქონდათ. ადგილი ჰქონდა დამკვირვებლებზე ფიზიკურ და სიტყვიერ შეურაცხყოფას. საინტერესოა ის, რომ დარღვევებზე კომისიის წევრებს, როგორც წესი, რეაგირება არ ჰქონდათ, ანუ თუ დამკვირვებელი მიუთითებდა, სრულიად ნიჰილისტური დამოკიდებულება ჰქონდათ ამ ყველაფერზე, ვიდრე დააფიქსირებდნენ, რომ დამკვირვებელი ან იღებს, ან ცდილობს გადაიღოს დარღვევა. ამ შემთხვევაში იწყებოდა უკვე მუქარა, ზეწოლა, ფიზიკური შეურაცხყოფაც.

ის, რომ არჩევნები შესაძლებელია გაყალბდეს, ჩვენ რეალობაში ეს აბსოლუტურად მოსალოდნელია და პასუხისმგებლობა მეორე მხარისაც, მე მგონი, აუცილებლად დასასმელია", — ამბობს ხიჯაკაძე NEWS.On.ge-სთან.