ჭიათურის მაღაროს და ზესტაფონის ფეროს გაჩერებით 5400-მდე ადამიანი რჩება უმუშევარი, ამის შესახებ ინფორმაციას bm.ge ავრცელებს.

ბიზნეს-მედია წერს, რომ გუშინ შპს „მაღაროელის“ თანამშრომლებს შეხვდა კომპანიის წარმომადგენელი, თემურ ხონელია და განუცხადა, რომ კომპანია 6 თვით, 2025 წლის აპრილამდე აჩერებდა მუშაობას. დასაქმებულებს საშუალება ჰქონდათ ხელფასის 60% მიეღოთ.

"თავიდან ამბობდნენ, რომ საწარმოები გაჩერდებოდა 3 თვე, თუმცა გუშინ საღამოს გვითხრეს, რომ საუბარია სამუშაო პროცესის 6 თვემდე გაჩერებაზე. თანამშრომლებისთვის პირობები მიუღებელია, 60%-იანი ანაზღაურება საკმარისი არ არის, რადგან საბანკო ვალდებულებები აქვთ. მათ გვაჩვენეს დოკუმენტაცია, რომ მთავრობა საწარმოების გაჩერების ნებართვას აძლევს. თუ სახელმწიფომ შეისწავლა და ნამდვილად კრიზისშია კომპანია, მაშინ აიღოს თავის თავზე პასუხისმგებლობა და გადაგვიხადოს დარჩენილი თანხა, ან უზრუნველგვყოს სამსახურებით", - განუცხადა bm.ge-ს მაღაროელმა ტარიელ მიქაცაძემ.

მიქაცაძის ინფორმაციით, ზესტაფონის ფეროშენადნობთა ქარხანაში 1800 ადამიანი მუშაობს, ხოლო ჭიათურის მაღაროში 3600-მდე.