საერთაშორისო რესპუბლიკურმა ინსტიტუტმა (IRI) და ეროვნულმა დემოკრატიულმა ინსტიტუტმა (NDI) საქართველოს საპარლამენტო არჩევნებთან დაკავშირებით ბრიფინგი გამართეს. NDI-ის წარმომადგენელმა, პერ ეკლუნდმა საარჩევნო და არჩევნებისწინა დარღვევებზე ისაუბრა:

"მაღალი იყო აქტივობა, რაც ნიშნავს, რომ ქართველები მხარს უჭერენ დემოკრატიას, თუმცა ასევე ნათელია, რომ წინასაარჩევნო პერიოდმა ვერ მოახერხა დემოკრატიული არჩევნების ფუნდამენტური სტანდარტების დაცვა. სახელმწიფოს მიერ დაფინანსებული ძალისხმევა, რომ ძირი გამოეთხარა, ხელი შეეშალა სადამკვირვებლო მისიებისთვის, კანონების გამოცემა, რომელიც სამოქალაქო საზოგადოების წინააღმდეგ იყო მიმართული, მუქარები, დაშინება მოქალაქეებისა და დამკვირვებლების მიმართ, არჩევნების დღესა და წინა პერიოდში მთელი პროცესის სამართლიანობას ძირს უთხრიდა. დელეგაცია თბილისში 21 ოქტომბერს ჩამოვიდა. ჩვენ გვქონდა შეხვედრები პოლიტიკურ ლიდერებთან, საარჩევნო ხელმძღვანელობასთან, მედიასთან, ასევე დიპლომატიური საზოგადოების წევრებთან საქართველოში. NDI-ის დამკვირვებლების თანახმად, რომლებიც საქართველოს 10 სხვადასხვა რეგიონში მუშაობდნენ, ხმის მიცემა ძირითადად მიმდინარეობდა კანონის შესაბამისად, თუმცა დამკვირვებელთა ჯგუფებმა დააფიქსირეს მნიშვნელოვანი ზრდა მძიმე დარღვევებისა წინა არჩევნებთან შედარებით, მათ შორის ძალადობის გამოყენება და ბიულეტენების ჩაყრა", — განაცხადა ეკლუნდმა

საარჩევნო პროცესებზე ისაუბრეს IRI-ს წარმომადგენლებმაც. ორგანიზაციის განცხადებით, ქართული ოცნება იყენებდა სახელმწიფო რესურსებს და ახორციელებდა ისეთ სამართლებრივ და ადმინისტრაციულ ცვლილებებს, რომლებიც პოლიტიკურ კონკურენციას ზღუდავდა.

"2024 წლის წინასაარჩევნო პერიოდში უპრეცედენტო პოლიტიკური, სამართლებრივი და ადმინისტრაციული ცვლილებები განხორციელდა, რომელიც ზღუდავს პოლიტიკურ კონკურენციას. ამგვარი მანიპულაციები ქმნის არათანაბარ სივრცეს საარჩევნო სუბიექტებისთვის არჩევნებამდე. კენჭისყრის დღესთან საკმაოდ ახლოს, ქართულმა ოცნებამ გამოიყენა სახელმწიფო რესურსები იმისათვის, რომ გაეძლიერებინა თავისი კამპანია და ასევე შეემცირებინა ამომრჩევლების აქტივობა. და ამისათვის გამოიყენა ადგილობრივი თვითმმართველობის წარმომადგენლები. მუდმივი დაშინება და ზეწოლა საჯარო მოხელეებზე იყო ნამდვილად ნათელი. გარდა ამისა, ქართული ოცნება აკონტროლებდა ბევრ ადგილობრივ თვითმმართველობის წარმომადგენლებს, იყო დაშინება რომ თუკი ადგილობრივი მოსახლეობა მმართველ პარტიას არ მისცემდა ხმას, თითქოს შეუწყვეტდა სოციალურ დახმარებას. უნდა აღინიშნოს ცესკო-ს კომისიის შემადგენლობის საკითხი და უნდა აღინიშნოს ოპოზიციის მიერ თავმჯდომარის მოადგილის დანიშვნის გაუქმება, ეს ცვლილებები ნამდვილად აძლიერებს ეჭვებს პოლიტიკური მიკერძოებისა და დისბალანსის კუთხით საარჩევნო კომისიებში. ამ მიზეზების გამო კომისიების მიმართ ნდობა დამოუკიდებლობისა და მიუკერძოებლობის კუთხით ძალიან, ძალიან დაბალია", — განაცხადა IRI-ს სადამკვირვებლო მისიამ