ტოლერანტობისა და მრავალფეროვნების ინსტიტუტის (TDI) ადვოკატ შოთა თუთბერიძეს, ჩეხ ჟურნალისტ რეი ბეისლისთან შეხვედრის საშუალება არ ეძლევა. ადვოკატი ჟურნალისტის თბილისის აეროპორტში მონახულებას და მისი მდგომარეობის შესახებ ინფორმაციის მიღებას რამდენიმე საათია ცდილობს — ამის შესახებ რადიო თავისუფლება წერს.

23 წლის ჟურნალისტის უფლებების დაცვის საქმეში TDI იმის შემდეგ ჩაერთო, რაც მას 22 ოქტომბერს საქართველოში შემოსვლაზე უარი უთხრეს.

გავრცელებული ინფორმაციით, ჟურნალისტი პრაღიდან თბილისში ავიაკომპანია ჯორჯიან ვინგსის პირდაპირი რეისით ჩამოფრინდა. საქართველოში შემოსვლაზე უარის განცხადებაში არ მიზეზი არის განმარტებული და მონიშნულია ყველაზე ზოგადი არგუმენტი.

"მხოლოდ ეგ მუხლი არ შეიძლება იყოს არგუმენტი, მე უკვე შევატყობინე 112-ს, რომ საქმე გვაქვს გვაქვს უფლებამოსილების გადამეტების შემთხვევა", — ამის შესახებ, ადვოკატმა შოთა თუთბერიძემ, რადიო თავისუფლებასთან ინტერვიუში განაცხადა.

მისი თქმით, საქართველოს ხელისუფლებისთვის არასასურველი პირების შეფერხება და მათთან ადვოკატის არდაშვება, ისევე როგორც განმარტებების გარეშე უარი ქვეყანაში შემოსვლაზე, არის მანკიერი, თუმცა გავრცელებული პრაქტიკა. მისივე თქმით, უმეტეს შემთხვევაში, ამაში პრობლემას ვერც სასამართლო ვერ ხედავს და ასეთი საქმეების გასაჩივრებისას თითქმის არასოდეს ითხოვს იმ ინფორმაციას, რომელიც საფუძვლად დაედო ამა თუ იმ პირის საქართველოს საზღვრიდან გაბრუნების გადაწყვეტილებას.

თუთბერიძე მედიასთან ინტერვიუში ამბობს, რომ ჩეხი ჟურნალისტი, ამ დროისთვის, საქართველოს აეროპორტის ნეიტრალურ ზონაში, პირადი ნივთებისა და ახლობლებთან რაიმე სახის კომუნიკაციის უფლების გარეშე იმყოფება. სავარაუდოდ, ჩეხ ჟურნალისტს ნეიტრალურ ზონაში 26 ოქტომბრამდე დატოვებენ, რადგან სწორედ ამ დღეს აქვს ნაყიდი თბილისი-პრაღა პირდაპირი რეისის ბილეთები.

ჩეხმა ჟურნალისტმა, საქართველოს საზღვარზე შექმნილ პრობლემაზე 22 ოქტომბრის საღამოს, სოციალურ ქსელ X-ზე თავად გაავრცელა, სადაც ეწერა რომ საღამოს 8-ის ნახევრისთვის, ყველანაირი საბუთის გარეშე, საქართველოში შემოსვლაზე უარი უთხრეს. მანვე გამოაქვეყნა დოკუმენტი, სადაც უარის მიზეზად მითითებულია ზოგადი პუნქტი: “არ აკმაყოფილებს საქართველოს კანონმდებლობით განსაზღვრულ სხვა მოთხოვნებს".

რეი ბელისის საქართველოში არ შემოშვებას ჟურნალისტური ეთიკის ქარტიაც გამოეხმაურა და შსს-ს მოუწოდა ჟურნალისტის დაუყოვნებლის შემოშვება საქართველოში, რათა პროფესიული მოვალეობის შესრულება შეძლოს.

"საქართველოს ხელისუფლების პირდაპირი მოვალეობაა, კანონის ფარგლებში უზრუნველყოს ყველა ადგილობრივი და უცხოელი ჟურნალისტის წვდომა იმ ტერიტორიებსა და ინფორმაციაზე, რაც მათ საქართველოში მიმდინარე არჩევნების გასაშუქებლად სჭირდებათ. ის, თუ როგორ მოექცევა საქართველოს ხელისუფლება უცხოელ ჟურნალისტებს, აუცილებლად მოახდენს გავლენას არჩევნების ხარისხზე და საერთაშორისო ორგანიზაციების შეფასებებშიც აირეკლება", — წერია ქარტიის განცხადებაში.

იმავე განცხადებაში ვკითხულობთ, რომ სექტემბერში მსგავსი საფუძვლით საზღვრის გადაკვეთაზე უარი ორმა უცხოელმა ჟურნალისტმა მიიღო.

მსგავსი შემთხვევა 16 სექტემბერს, ქუთაისის აეროპორტში მოხდა, როდესაც საქართველოში მცხოვრები ბელარუსი ჟურნალისტი და აქტივისტი, ანდრეი მიალეშკა, რომელიც არასრულწლოვან შვილთან ერთად ბრუნდებოდა საქართველოში — პოლონეთში გააბრუნეს.

ამასთან, 17 სექტემბერს ქართულ-სომხური მედიაგამოცემა Aliq Media-ს დამფუძნებელი და ერთ-ერთი რედაქტორი არსენ ხარატიანი საქართველოში არ შემოუშვეს. იგი ლუქსემბურგიდან თბილისში მოფრინავდა, საიდანაც სომხეთში უნდა გადასულიყო. ხარატიანი სტამბულში გააბრუნეს, რის შემდეგაც მას ლუქსემბურგში მოუწია წასვლა.